Nga Mero Baze
Rusia po izolohet politikisht, ekonomikisht dhe në propagandën e saj. Pezullimi i Rusisë nga Këshilli i Europës, propozimi amerikan për përjashtimin e saj nga Komiteti për të Drejtat e Njeriut në OKB, dhe propozimet më të ashpra të Boris Johnson për ta përjashtuar nga OKB, po krijojnë një botë të re, në të cilën Rusia po izolohet.
Aktualisht ajo ka mbetur e vetme në kontinentin europian, me Serbinë dhe Bjellorusinë, ndërsa pjesa tjetër e botës nuk i ka dhënë mbështetje, por ka ruajtur neutralitet ndaj kësaj situate. SHBA dhe Kanada ndërkohë llogariten si bota perëndimore.
Ky është izolimi më i pashembullt i një vendi në historinë e botës, pasi dhe në Luftën e Dytë Botërore, bota ishte e ndarë në dy kampe dhe fashizmi nuk ishte kaq i izoluar. Sot Rusia e Vladimir Putinit, është thuajse e vetme dhe pa asnjë aleat të shpallur pro saj në këtë konflikt.
Të njëjtin fat po pëson dhe propaganda e saj. Bashkimi Europian ka urdhëruar censurimin e sinjalit të televizoneve ruse të lidhura me pushtetin e Putinit në Europë, në krye të të cilëve qëndron Sputnik.
Për të kuptuar se çfarë niveli është propaganda e tyre, dy ditë më parë në faqen zyrtare të kësaj medie u postua një lajm që u fshi pak më vonë, i cili fliste për pushtimin e Kievit, dorëzimin e qeverisë dhe shpalljen e një qeverie të re pro ruse në Kiev.
Sipas ekspertëve të medias perëndimore, që njohin teknologjinë e propagandës ruse, ky ishte një nga ato fakte që zbulonte se media shtetërore e Putinit ka bërë gati shkrimet, editorialet dhe raporte fiktive televizive për propagandë, para se të ndodhin, sipas një skenari që ka pasur ushtria për marrjen e Kievit dhe rrëzimin e qeverisë. Thjesht e ka postuar gabimisht në orën kur e ka pas planifikuar, sipas axhendës së sulmit. Më pas shkrimi u hoq, por ai la gjurmët e strategjisë së propagandës së medias së Putinit në këtë masakër në Ukrainë.
Edhe Shqipëria duhet t’i bashkohet qëndrimit të Bashkimit Europian në këtë pikë, duke i censuruar përmes AKEP dhe AMA këto kanale. Nga ana tjetër, këtu palën ruse në ekrane, e kanë zëvendësuar ose psikopatë që deri dje flisnin kundër vaksinave, ose njerëz me devijime mendore që janë vetëshpallur si mbartës të akuzave anti-amerikane, pro myslymane apo pro ruse, të cilët në shtëpi të tyre i kanë hall, ndërsa ekranet tona i kanë “mall”.
Kriteri nëse një TV në Shqipëri është apo jo serioz, së pari duhet ndarë nga këta të ftuar. Por mjerisht këtu ekranet janë në garë kush t’i ftojë më shumë. Së fundmi, duhet të mbyllet dhe tregu rus në rajon dhe Shqipëri, edhe pse nuk është shumë i konsiderueshëm. Por duhet mbyllur qoftë dhe simbolikisht.
Kjo krizë provoi se të gjitha rekomandimet kundër investimeve ruse në Shqipëri dhe nga ana tjetër gjithë orientimi i investimeve strategjike tek vendet perëndimore, është aspekt i sigurisë kombëtare. Jo vetëm për ne, por dhe për vendet e tjera të Ballkanit.
Përfytyroni Greqinë, sikur të merrte mendjen e Varufakis dhe iluzionet e Cipras dhe të zgjidhte krizën greke të vitit 2012, duke marrë borxh tek Rusia, ku shkoi. Mendoni çdo ta kishte gjetur Greqinë tani, kur rubla po bie me shpejtësinë me të cilën t’i ecën për të blerë domate në treg.
Nga ana tjetër, tani kuptohet qartë se populistë si Albin Kurti mund të të hedhin në erë sigurinë kombëtare në emër të “sovranitetit”. Ai refuzoi projektin amerikan që të marrë gazin e lëngët amerikan, edhe pse qeveria e mëparshme kishte rënë dakord, pasi sipas tij, “është i shtrenjtë” kundrejt gazit rus.
Ai po ashtu akuzoi Hashim Thaçin se ka bërë marrëveshje të fshehta me NATO-n, ndërsa sot me të drejtë kërkon që Kosova të bëhet anëtare e NATO.
Populizmi vlen për fushata elektorale, por për të mbijetuar në familjen perëndimore vlen mbështetja tek Perëndimi, tek tregu i tij, tek vlerat demokratike të tij dhe standartet e ekonomisë së tregut të tij.
Sikur tani të ishim në dorë të Rusisë, do dëgjonim dhe këta “gjeopolitikanët” tanë të na rekomandonin “as me Lindjen, as me Perëndimin”.
