Filmi “Tri dritare dhe një varje” me regji të Isa Qosjës ka fituar çmimin për filmin më të mirë në Festivalin Cinema du Monde në Sherbrooke të Kanadasë.
Nën përkthimin francez “Trois fenêtres et une pendaison”, filmi kosovar ka qenë në mesin e katër çmimeve që ky festival ka ndarë në natën e tij të fundit.
Patricio Henríquez, Rachida Azdouz, Lise Bellehumeur, Sylvie Luce Bergeron dhe Daniel Gaudreau, siç transmeton KultPlus, ishin pjesë e jurisë së festivalit.
Filmi artistik i metrazhit të gjatë “Tri dritare dhe një varje”, është me skenar të Zymber Kelmendit dhe regji të Isa Qosjës dhe flet për pasojat e dhunës seksuale të ushtruar nga serbët .
Në këtë film kanë luajtur aktorët: Irena Cahani, Luan jaha, Aurita Agushi, Donat Qosja…, me producentë: Shkumbin Istrefi e Mentor Shala.
