Treni “Rama” dhe karroca “Berisha”

Nga Artur Ajazi

Sikur Edi Rama, ti kishte marrë seriozisht prej 2013 të gjitha fjalët, fjalimet, akuzat, denoncimet, dhe paralajmerimet e Berishës, besoj se do të ishim akoma 12 vjet mbrapa në kohë reale. Sikur Edi Rama, ti kishte besuar dhe sikur ti kishte kthyer “xhavap” çdo absurditeti të ardhur nga selia blu dhe kreu i saj prej 2013, besoj se sot nuk do të kishim bërë as 2 hapa drejt zhvillimit, integrimit, dhe hapjes së vendit drejt BE. Ja pra që treni “Rama”, e nisi rrugëtimin dhe nuk ka shanse të ndalet deri në oborrin e BE në Bruksel në 2030.

E ç’tha Rama, dhe nuk e bëri ? Kjo natyrisht lidhet, qysh me qenien e tij kryetar bashkie në 3 mandate në Tiranë. Askush dhe asgjë nuk e ndalte projektin e tij për pastrimin e Lanës, pastrimin e Tiranës nga bixhdilet, pislliqet, dhe qindra e mijëra kioska pocaqi. Por fati e deshi që ai, të vijë si kryeminister i vendit, që shqiptarët të shihnin dhe provonin këmbënguljen dhe vizionin e tij kësaj here, për Shqipërinë Europiane.

E nisi duke rrafshuar pallate dhe objekte pa leje, qysh ditët e para të tij si kryeminister në 2013. U duartrokit. Mori urime dhe mbështetje nga shqiptarët. Në krahun tjetër, nisën  mallkimet, urrejtja, akuzat, sharjet, fyerjet, nxitja e veprimeve antiligjore, por më kot. Treni “Rama” nuk ndalej. Nisi zbatimi i projekteve të mirëmenduara qysh para 2013 për qytetet dhe fshatrat, se ç’do të bëhej me fatet e këtij vendi kur Saliu të kishte ikur nga pushteti. Nuk mund të punohej dhe vazhdohej me mendësi të viteve’90. Ishim në batak, ishim në errësirë, me borxhe deri në grykë si shtet, dhe shqiptarët strapacoheshin për një çertifikatë.

Vendi nisi të ecte me ritme elefanti. Por edhe nga ana tjetër e politikës, nga errësira e saj, nuk pushonte megafoni dhe “karroca” e Berishës. Duke u marrë me trenin expres “Rama”, kreu i PD-së, harroi se ishte në pikën e hallit, ai dhe partia e tij. E kishte harruar se, të drejtoje një parti në opozitë, nuk duhej të merreshe me poturet e kryeministrit por me punën e tij.

E kishte harruar se, të drejtoje partinë në opozitë, përballë 2 metroshit që vetëm punonte dhe u rrinte projekteve mbi kokë, duheshin ditë dhe netë të gjata pa gjumë, dhe vetëm punë. Por Berisha e mori lehtë, ashtu si gjithmonë. Vetëm 6 muaj nga ikja nga pushteti në 2013, i mbushte me rrena të vetët se “ky nuk e mbush vitin, do ta rrëzojmë, ne do të rikthehemi shumë shpejt në pushtet”. Dhe ata të shkretë e besonin. Ashtu siç e besuan, edhe para dhe pas 11 Majit 2025, kur PD humbi thellë, zgjedhjet e vetme nga mund të shpresonte Berisha se do të rikthehej në pushtet. Por si mund të vish në pushtet, hipur mbi “karrocë”, kur ke trenin expres  në krahun tjetër ? Absurdi  nuk ndalej, absurdi thellohej, aq sa u bë skenar i besueshëm.

“Na vodhën, na i bleu, na i mori votat me banda”. Këto ishin dhe mbeten sërish sipas tij, “argumentet  justifikuese për humbjen”. Edhe pse i premtoi demokratëve se “do ta mbrojmë votën tuaj”, sërish nuk po u jep atyre shpjegime se “përse nuk e bëri mbrojtjen e votës”. Banda, banditë, narkoshtet…..ky ishte  dhe mbetet fjalori i Berishës. Ky mbetet edhe sot justifikimi për humbjen, e parë e gjitha kjo, nga maja e  “karrocës” e cila  ka ngecur në baltën e madhe të rrenave dhe mashtrimeve, të cilat po u serviren demokratëve të tulatur, si argumente “bindëse” për vazhdimësinë e qëndrimit të Berishës si kryetar PD-je.