Biznesmeni korçar që ra pre e grabitësve me maska një natë më parë në fshatin Lumalas të Korçës pretendon se i janë marrë shuma të mëdha parash nga dy kasafortat që u boshatisën në dhomën e tij të gjumit.
Në dëshminë e tij dhënë në polici, Ibrahim Shahollari 60 vjeç pretendon se i janë marrë 100 milion lekë shqiptare dhe 60 mijë paund.
Sipas tij, lekët shqiptare i kishte nga fitimet e biznesit, ndërsa 70 mijë paund ishin kursime të njërit prej djemve të tij që ka në Angli.
NGJARJA DJE
Një çift bashkëshortësh ka rënë pre e grabitjes me armë e maska gjatë natës në banesën e tyre, ku autorët kanë arritur t’u marrin një shumë të madhe parash. Sipas të dhënave, i zoti i shtëpisë, shtetasi Ibrahim Shahollari, i cili njihej në zonë si tregtari më i madh i patateve me destinacion jo vetëm tregun shqiptar, por edhe atë të huaj, është ndeshur gjatë natës me grabitësit e armatosur.
Me armën në kokë, ai është detyruar që të hapë dy kasaforta që kishte në vilën e tij trekatëshe dhe t’u dorëzojë atyre shumën e 100 milionë lekëve dhe 60 mijë paund. Në total në lekë shqiptare shkojnë në rreth 190 milionë.
Sipas të dhënave të Policisë, bazuar edhe në dëshminë e të dëmtuarit, ngjarja ka ndodhur dje rreth orës 03:00.
Shaholli bashkë me gruan e tij kanë qenë në gjumë, kur krejt papritur personat e maskuar dhe të armatosur kanë behur në dhomën e tyre. I gjendur para kësaj situate dhe duke dashur të mbrojë bashkëshorten e veten nga dhuna që mund të përfundonte edhe në mënyrë tragjike, deri në vrasjen e tyre, tregtari 60- vjeçar u është bindur.
Ai ka shkuar dhe ka hapur kasafortat, duke ua dorëzuar në dorë autorëve shumën e madhe të parave.
Gjatë marrjes në pyetje në polici, 60- vjeçari ka pohuar se 100 milionë lekët e grabitura ishin grumbulluar prej tij në sajë të punës si tregtar i patateve, ku e gjithë zona i grumbullonte tek ai.
Ndërsa 60 mijë paundët ishin në pronësi të fëmijëve të tij që jetonin në Angli./Panorama/a.m.
