Aksionet depozitare amerikane të tri kompanive kineze të telekomunikacionit do të çlistohen nga Bursa e Nju-Jorkut pas dështimit të apelimit prej tyre.
“China Mobile”, “China Unicom” (Hong Kong) dhe “China Telecom” deklaruan të premten e kaluar se presin që Bursa e Nju-Jorkut t’i njoftojë rregullatorët për çlistimin.
Vendimi do të hyjë në fuqi dhjetë ditë pasi bursa t’i dërgojë një “Formular nr. 25” Komisionit të Sigurimeve dhe të Bursave të ShBA-së.
Çregjistrimi është rezultat i kufizimeve të investimeve prej ish-presidentit Donald Trump ndaj firmave teknologjike kineze.
Bursa e Nju-Jorkut bëri të ditur në janar se, pas diskutimeve të shumta, mori vendimin për të hequr aksionet e këtyre tre kompanive.
Më 20 janar, pak pasi Joe Biden mori detyrën e presidentit, kompanitë apeluan në bursë për rishikimin e këtij vendimi. Megjithatë, vendimi u rikonfirmua të enjten.
Presidenti i ri Biden e ka ruajtur këtë dekret, pavarësisht tensioneve të vazhdueshme midis dy ekonomive më të mëdha botërore, duke shpërfillur kundërshtimet e qarqeve të biznesit.
Sipas Komisionit Rregullator të Letrave me Vlerë të Kinës, çlistimi ka një ndikim shumë të kufizuar ndaj këtyre kompanive të telekomit, pasi vetëm një pjesë e vogël e aksioneve të tyre tregtohen në ShBA.
