Masakra e ndodhur më 3 shkurt në Elbasan, me 3 të vrarë dhe 8 të plagosur në lokalin e kompleksit “Univers” duket se do të jetë dosja e radhës që do arkivohet.
Kjo për shkak të provave shumë të pakta dhe mungesës së personave të dyshuar të ndaluar.
Megjithëse Policia dhe Prokuroria kanë 3 emra personash në dosje si të dyshuar për atentatin ndaj fisit Çapja dhe disa prej motiveve, fakti që ata janë arratisur dhe mungesa e një dëshmie apo prove, e bën hetimin edhe më të vështirë dhe ngjarjen të pamundur për t’u zbardhur.
Burime nga grupi hetimor këmbëngulin se ka dyshime të forta që ata 3 persona të njohur edhe si kontingjent krimi janë të implikuar në ngjarje, pasi janë larguar po atë ditë jashtë vendit, pasi nuk u gjetën në banesa.
Por ky dyshim nuk i bën autorë të ngjarjes për momentin, megjithëse kur të kthehen nga jashtë vendit do të shoqërohen.
Kur kanë kaluar tre javë nga masakra, Prokuroria e Elbasanit dhe Krimet e Rënda ende nuk kanë në dorë ekspertizën balistike dhe të gjurmëve të gishtërinjve. Megjithëse është konfirmuar qitja me 3 armë automatike dhe me 68 plumba.
Nga ekspertiza balistike pritet të zbulohet mënyra si kanë vepruar autorët dhe pozicionet ku ata kanë qenë të vendosur. Nuk është përcaktuar ende nëse këto armë janë përdorur edhe në krime të tjera. Po kështu të dhënat për autorët dhe makinat e atentatit janë të pakëta.
Asnjë prej 2 mjeteve fuoristradë “BMW” dhe “Benz” nuk janë gjetur ende. E para me të cilën lëvizën atentatorët dhe e dyta që ka spiunuar lëvizjet në lokalin e fisit Çapja.
Janë kryer mbi 60 shoqërime personash, madje edhe marrje në pyetje nga dy herë e tyre për të vlerësuar alibitë që kishin. Dhe aktualisht grupi hetimor e ka dosjen pa asnjë autor dhe pa një pistë konkrete.
Deri tani hetohet në tre pista, ajo e hakmarrjes për konfliktet e vjetra mes fiseve Çapja dhe Mema, rivaliteti për trafiqet e drogës, si dhe një hakmarrje pas ndonjë sherri banal me grupet e vogla të narkotrafikut në qytet.
Në atentatin e 3 shkurtit, në lokalin ku qëndron pjesëtarët e familjes Çapja, gjetën vdekjen Agron Çapja, Eno Bedalli dhe Ardit Sinakolli, të afërm, si dhe u plagosën 8 persona të tjerë, 3 nga fisi Çapja, disa miq dhe krushq të tyre.
