Një zjarr i madh shpërtheu të shtunën në burgun famëkeq të Evin, ku mbahen të dënuarit politik, gazetarët dhe shtetasit e huaj. Tym dhe flakë u panë në videot e publikuara online, ndërsa mund të dëgjoheshin të shtëna armësh, shpërthime e po ashtu thirrjet “vdekje diktatorit”.
Turma të mëdha njerëzish u mblodhën jashtë burgut, qarkullimi u paralizua dhe efektivë të policisë u panë ndërsa hynin në godinë.
Një zyrtar i cituar nga media shtetërore tha se situata ishte vënë nën kontroll por gjithçka mbetet e paqartë, dhe xhirime të mëvonshme treguan se zjarri vazhdonte. Irani është përfshirë prej javësh nga protestat antiqeveritare, të nxitura nga vrasja e 22-vjeçares kurde Mahsa Amini, teksa ishte ndaluar nga forcat e rendit.
Autoritetet thonë se vdiq si pasojë e një infarkti po familjarët këmbëngulin se ishte rrahur për mos mbajtjen e shamisë nga policia.
Situata në burg mund të jetë e lidhur me demonstratat e fundit pasi qindra protestuar të arrestuar janë dërguar pikërisht në burgun Evin. Megjithatë mediat shtetërore pretendojnë se dy ngjarjet nuk janë të lidhura, dhe fajësojnë elementët kriminale për zjarrin. Tetë persona u plagosën sipas agjencisë së lajmeve IRNA.
Burgu është kritikuar vazhdimisht nga grupe për të drejtat e njeriut, për metodat e torturave, burgosjen pa afat dhe mungesën e ndihmës mjekësore për të dënuarit.
Vendi është I mbërthyer nga protestat masive që prej 17 shtatorit, ku sipas aktivistëve të paktën 233 vetë janë vrarë, 32 prej të cilëve nën moshën 18 vjeç.
/a.r
