Ka reaguar për herë të parë shtetasi Nuel Kalaj në lidhje me çështjen e privatizimit të OSSH-së, e cila po hetohet nga një komision i posaçëm parlamentar.
Pas akuzave të kreut të komisioni Taulant Balla, shtetasi Nuel kalaj deklaron se ai është i gatshëm të dëshmojë vullnetarisht.
Sipas shumicës qeverisëse, ky person është sekseri i qeverisë Berisha me kompaninë CEZ, e cila bleu më pas OSSH.
Sipas deputetit socialist Taulant Balla, hetimet zbuluan se shtetasi Nuel (Nue) Kalaj, miku i ngushtë i djalit të ish-kryeministrit, Shklëlzen Berisha, ka marrë nga CEZ transferta bankare mbi 7 milionë euro.
“Këto shuma më pas i ka tërhequr cash më 16 qershor 2009, vetëm pak ditë para zgjedhjeve të vitit 2009”- tha Balla.
Por sot, Nuel Kalaj reagon dhe thote se do të shkojë vullnetarisht për të dëshmuar.
REAGIMI I PLOTE I KALAJT:
Unë Nuel Kalaj dëshiroj të informoj se në lidhje me ftesën për tu paraqitur në Komisionin hetimor parlamentar për çështjen e CEZ.
Ndodhem në Kosovë dhe njoftimin e kam marrë një ditë përpara mbledhjes.
Për shkak të kushteve të vështira të motit e kisha të pamundur të udhëtona në Tiranë.
Nuk fshihem dhe nuk i iki përgjegjësisë për këtë çështje.
Aktiviteti im është i mbështetutr në baza ligjore dhe marrëveshja ime me CEZ ka qenë kontraktuale.
Pas pushimit jam i gatshëm të paraqitem vullnetarisht në komisionin hetimor për CEZ./a.m.
