Trajneri i Spanjës, Julen Lopetegui, nuk i ka kursyer elozhet për formacionin e kuqezinjve. Ai ka deklaruar se Spanjën e presin dy sfida delikate, të cilat do të zhvillohen në pak ditë distancë nga njëra-tjetra.
Sipas tij, skuadra që drejton do të duhet të bëjë një punë të vështirë, pasi përballë ka dy ndeshje delikate dhe shumë të rëndësishme për iberikët në lidhje me një biletë për në Botërorin “Rusi 2018”, shkruan Panorama Sport.
Në ditën që Spanja do të ketë përballë Italinë, Shqipëria do të luajë në transfertë kundër Lihtenshteinit. Për momentin, të treja këto skuadra – Italia, Spanja dhe Shqipëria – janë në kuotën e tri pikëve, pas ndeshjes së parë që kanë fituar secila prej tyre.
“Na presin dy ndeshje delikate. Italia dhe Shqipëria janë dy rivalë shumë të vështirë”, është shprehur shkurt Lopetegui për mediat spanjolle.
Të enjten e datës 6 tetor, kuqezinjtë kanë një shans të artë për të siguruar trepikëshin e radhës, ndërkohë që dy skuadrat më të forta të grupit si dhe pretendentet kryesore për vendin e parë luajnë kundër njëra-tjetrës.
BW/d.i.
