Ish-mbrojtësi i Milanit, Real Madrid dhe Romës, Christian Panucci zyrtarizohet nesër si trajner i kombëtares shqiptare.
Lajmi konfirmohet nga vetë FSHF, të cilët bëjnë të ditur se do jetë presidenti Armand Duka i cili do prezantojë nesër në orën 11:00 trajnerin e ri përpara medias gjatë një konference për shtyp.
Panucci mbërrin në Tiranë mbrëmjen e kësaj të marte ku do të pritet në aeroport nga zyrtarë të FSHF-së.
Christian Panucci u përzgjodh mes një morie emrash si Sedorf, De Canio, Malesani, Zenga, etj, që u kontaktuan nga FSHF, për të marrë drejtimin e kombëtares. Ai konsiderohej që në fillim si i preferuari i Dukës por detajet e bisedimeve nuk u bënë të ditura deri në momentin e fundit.
Në karrierën si futbollist, Panucci numëron një sërë klubesh me emër si Milan, Real Madrid, Inter dhe Roma, ndërsa si trajner, ka drejtuar Livornon dhe Sienën në Seria A. Në rang ndërkombëtar, Panucci ka vetëm një eksperiencë si ndihmës i Fabio Capello-s, në Botërorin e vitin 2014, me kombëtaren ruse.
Panuccit do t’i duhet të zëvendësojë një emër si Gianni De Biasi, i cili la gjurmë në futbollin shqiptar duke kualifikuar për herë të parë Shqipërinë në Europianin e vitit të kaluar në Francë.
Ish-krahu i djathtë i Fabio Capelos gjatë drejtimit të kombëtares ruse, merr nesër kreun e pankinës kuqezi.
Christian Panuçi ka mbrojtur fanellën e Milanit, Real Madrid dhe Romës për vite me radhë.
Ai ka qenë ndër mbrojtësit më të mirë të kombëtares italiane.
a.ç
