Serbët e Kosovës, duhet të bëjnë koalicion me Albin Kurtin, sepse ky koalicion është më i pranueshëm se ai me Haradinajn. Sipas, Momçilo Trajkoviçit nga Forumi nacional serb, koalicioni me Vetëvendosjen, do të ishte më i dobishëm për Kosovën dhe serbët.
“Për serbët e Kosovës, koalicioni me Albin Kurtin që ka duart e pastra, është shumë më i pranueshëm, se ai me Ramush Haradinajn”, ka thënë Trajkoviq për Zërin e Amerikës.
Por, për Vetëvendosjen, Lista Serbe është e përjashtuar nga mundësia për koalicion.
Ndërkaq, Petrit Zogaj nga Lëvizja “FOL”, vlerëson se një koalicion i tillë edhe mund të ndodhë. Në anën tjetër, ende asnjë ftesë nuk e kanë marrë përfaqësuesit serbë të Kosovës për konsultime për formimin e Qeverisë. Kështu të paktën ka thënë për mediat serbe kryetari i Listës Serbe, Slavko Simiq.
Ai ka mohuar pohimet që përfaqësues të kësaj liste të kenë biseduar jozyrtarisht me kryetarin e PDK-së, Kadri Veseli. Ndërkaq, drejtori i të ashtuquajturës Zyrë për Kosovën, Marko Gjuriq, e ka ftuar Listën Serbe që të mos nxitojë dhe t’ua lërë partive shqiptare, që, nëse munden, të merren vash për ta formuar Qeverinë e ardhshme të Kosovës. (b.an)
