Në harkun kohor të dy javëve, në mënyrë misterioze 27 fëmijë janë zhdukur në Cleveland të SHBA-ve duke shkaktuar shqetësim te autoritetet, me një prej drejtuesve më të lartë të policisë që shprehet se nuk është përballur me një fenomen të tillë në 33 vite karrierë.
Shefi i policisë së Newburgh Heights, John Majoy që shërben edhe si president i bordit të organizatës Cleveland Missing, e quajti të paprecedentë numrin e fëmijëve të zhdukur, moshat e të cilëve variojnë nga 12 deri në 17 vjeç.
“Ka gjithmonë maja dhe lugina me persona të zhdukur, por këtë vit duket si një vit i jashtëzakonshëm”, tha ai për Fox News.
“Për disa arsye, në vitin 2023, ne kemi pasur shumë më tepër raste sesa kemi normalisht, gjë që është shqetësuese pjesërisht sepse nuk e dimë se çfarë po ndodh me disa nga këta fëmijë, nëse ata janë duke u trafikuar apo nëse ata janë përfshirë në aktivitete bandash ose droge”, shtoi ai.
Policia e Cleveland konstaton se fëmijët janë raportuar të zhdukur midis 2 dhe 16 majit, ndërsa Majoy beson se shumica e rasteve ka të ngjarë të jenë të arratisur dhe jo rrëmbime. Por ai paralajmëroi se adoleshentët janë naivë dhe kanë më shumë gjasa të jenë gënjyer nga grabitqarët, të cilëve ai iu referua si “ujqërit me lëkurë deleje”.
Zhdukjet nuk bëjnë lajm nëse nuk ka një Amber Alert sipas shefit të policisë, duke shtuar se historitë e tyre nuk po shfaqen në mediat sociale.
Që të lëshohet një Amber Alert, ka kritere strikte që duhet të plotësohen, si p.sh. policia të ketë një besim të arsyeshëm se ka pasur një rrëmbim dhe se fëmija është në rrezik të menjëhershëm për lëndime të rënda trupore ose vdekje. Gjithashtu duhet të ketë informacion të mjaftueshëm përshkrues për fëmijën dhe rrëmbimin.
“Është një krim i heshtur që ndodh nën hundën tonë. Problemi është se ku janë ata? Ku shkojnë ata? Ata mund të jenë në një shteëpi ku kultivohet drogë, ose të shfrytëzohen për prostitucion apo të përfshirë në trafikun e drogës dhe banda”, nënvizoi ai.
Ai shtoi se shumë adoleshentë do të kërkojnë bandat si zgjidhje kur ata janë të dëshpëruar për mbrojtje. Kjo shpesh çon në fillimin e krimeve të tilla si vjedhja e makinave dhe grabitjet apo edhe shitja e trupave të tyre dhe përdorimi i drogës, duke rezultuar që ata të bëhen të varur.
Ajo që e bën edhe më të vështirë kërkimin është mungesa e fotografive në rastet e listuara në faqen e internetit për fëmijët e humbur të Cleveland./m.j
