Gruaja e emigrantit shqiptar nga Kurjani i Roskovecit, që humbi jetën pas tërmetit në Itali, tashmë është e gjymtuar. Pëllumb Toro, xhaxhai i emigrantit shqiptar Erjon Toro, tregon se asaj i kanë prerë të dyja këmbët.
Në një rrëfim për “Gazeta Shqiptare”, ai tregon se gruaja e nipit të tij, Elsa Toro, ka humbur të dyja këmbët, pas ndërhyrjes kirurgjikale që i bënë mjekët në Itali.
“Me nusen e Erjonit nuk kemi folur, pasi ajo është në spital dhe gjendja nuk paraqitet e mirë. Fillimisht na thanë se kishte thyerje në të dyja këmbët dhe se gjendja e saj shëndetësore ishte stabilizuar. Por dje të afërmit tanë tanë atje na lajmëruan se gruaja e Erjonit i ka humbur të dyja këmbët. Nuk e dimë arsyen se çfarë i ka shtyrë mjekët italianë që t’i presin këmbët, mbase ishte mënyra e vetme për t’i shpëtuar jetën. Nuk dimë çfarë të themi tjetër.”- thotë ai.
Ai tregon më tej se kur morën lajmin për vdekjen e Erionit kanë folur vazhdimisht me të afërmit në Amatrice të Italisë.
“Ata na treguan se trupi i nipit ishte nxjerrë nga rrënojat dhe se ishte dërguar në morg. Tashmë pritet që të kryhen të gjitha procedurat në mënyrë që trupi i tij të vijë në Shqipëri. Gjithashtu, të afërmit na thanë se vajzat e mitura të Erjonit dhe bashkëshortja e tij Elsa ndodheshin në spital. Sipas tyre, vajza e madhe 9 vjeçe ka thyer njerin krah, ndërsa ka marrë goditje dhe në kokë. Ajo ndodhet në spital për ndihmë mjekësore, ndërsa gjendja shëndetësore ka ardhur duke u përmirësuar. Sa i përket vajzës së vogël 4-vjeçare, fatmirësisht nuk ka pësuar asnjë goditje dhe ndodhet në gjendje të mirë shëndetësore”-thotë ai, duke bërë apel që të vijë trupi i nipit sa më shpejt./a.m.
