Kryetari i Partisë Demokratike Lulzim Basha vizitoi në Qendrën Spitalore Universitare “Nënë Tereza” 4 personat e plagosur nga shpërthimi në uzinën e Ballshit. Basha shprehur ngushëllimet për familjen e viktimës ndërsa u uroi shërim të shpejtë personave të plagosur.
“Dua t’i shpreh ngushëllimet më të ndjera familjes së tij si dhe t’i uroj 4 të plagosurve të tjerë, por edhe të plagosurve në Fier e Mallakastër shërim të shpejtë. Dua të falenderoj stafin mjekësor që i ka ardhur në ndihmë menjëherë të lënduarve”, tha Basha pasi doli nga spitali.
Kreu i opozitës akuzoi qeverinë për mënyrën e privatizimit të ARMO-s, së rikthyer në punë vetëm pak ditë më parë. Ai tha se kemi të bëjmë me një proces klientelist të kalimit tek administratorët e rinj të uzinës ndërsa theksoi se PD do kërkojë zbarhdjen e ngjarjes deri në fund.
“Dje ndodhesha në Mallakstër disa orë para shpërthimit me strukturat e PD, por edhe me naftëtarët, dhe një nga pikat e diskutimit ishin kushtet e vështira të punës. I sigurova nga Ballshi dje se PD do ta ndjekë këtë çështje deri në fund. Ne kemi ndjekur dyshimet tona për mënyrën jo-transparente të këtij privatizimi klientelist të ARMO-s. Kemi dyshime për përfitimet e mëdha, ku shkojnë këto, pasi ka pasiguri. Kemi dyshime për shfrytëzimin pa asnjë kriter të krahut të punës. Kemi bërë kërkesë për komision hetimor për këtë privatizim.”, tha Basha./a.m.
