Detaje të reja dalin në dritë për tragjedinë e Halloween, teksa Koreja e Jugut po vajton ende fëmijët e saj. Bilanci i jetëve të humbur shkoi në 156, thuajse të gjithë të rinj rreth të 20-ave. Policia e Seulit ka pranuar gabimet e saj në menaxhimin e turmës gjatë të shtunës në mbrëmje. Reagimi i forcave të rendit u vlerësua “tepër zhgënjyes” edhe pse ishte njoftuar disa orë përpara tragjedisë për situatën e rrezikshme që ishte krijuar në zonën më të njohur të jetës së natës në kryeqytet.
“Si përfaqësues i organizatës, ndjej përgjegjësi të madhe. Policia ndjen përgjegjësi të thellë për sigurinë publike dhe ne do të bëjmë më të mirën tonë për të garantuar se tragjedi të tilla nuk do të ndodhin më kurrë.”
Kryebashkiaku i Seulit shpërtheu në lot, teksa u kërkoi ndjesë familjarëve të viktimave.
“Vizitova një person që kishte vajzën e tij 20-vjeçare në spital. Ai besonte se ajo do të mbijetonte, por mësova se ndërroi jetë. Kërkoj ndjesë për vonesën në reagimin tim.”
Por qytetarët nuk e falin këtë paaftësi të treguar nga autoritetet. Mes lotësh, shumë prej tyre shprehin mllef dhe zemërim, pasi policia nuk arriti të bënte detyrën e saj.
Në festën e parë të Halloween pas pandemisë koronavirus, vlerësohet të ishin rreth 100 mijë persona në lagjen ikonike të Seulit, Itaewon. Rrugët e ngushta dhe kaosi i krijuar, kombinuar me mosprezencën e policisë çuan në tragjedinë më të rëndë të viteve të fundit në Korenë e Jugut.
/a.r
