I gjithë fshati Gërmenj në Kavajë, ku ka jetuar më parë familja Negollari, është zhytur në zi e në dhimbje, pas humbjes tragjike në aksident pasditen e së shtunës të dy vogëlushëve Alice e Dritan 3 e 5 vjeç, në Qerret të Kavjës.
Familjarët të revoltuar mbi historinë e trishtë të familjes Negollari, deklarojnë se Sokolin e arrestuan dhe e harruan në burg, se ishte i varfër dhe nuk kishte mbështetje. Ata theksojnë se u mbajt shumë gjatë pas kangjellave të burgut vetëm për nisjen e ndërtimit të shtëpisë ku të fuste kokën, pasi i ishte refuzuar leja e ndërtimit që e kishte të domosdoshme.
“Në pronën e tij, në shtëpinë e tij, shembi të vjetrat dhe bëri të rejat. E harruan në burg, njeri për ta ndihmuar nuk kishte, di që ka kërkuar edhe leje”, tha kushëriri i Sokolit, Gezim Goxha.
“Ku do drejtohesh? Po nuk dhe lekë të japin leje”, tha një tjetër banor.
“Ata që ndërtojnë grataçela nuk përfundojnë në burg, se i kanë shpatullat e ngrohta, mbrohen nga shteti”, shtoi një tjetër.
“Sokali i ka shtëpitë këtu që kur i ka bërë i ati i vetë që në kohë…”.
“Po e ndërtonte shtëpinë aty ku e ka pasur”, tha një tjetër
“Të paktën ta linin në arrest shtëpie, mos ta merrnin brenda, ta linin te kalamanjtë e vet jo gjithë kjo tragjedi, dy fëmijë, dy lule”, thotë e afërmja e fisit, Zylfie Cani.
Ndërkaq tri ditë pas aksidentit situata për sinjalistikën në rrugë, vijon të jetë e njëjtë. Askush nuk ka ndërhyrë për të shmangur të tjera pasoja të rënda.
Në banesën e familjes Negollari në plazhin e Durrësit respektohet kodi i zisë. Aty janë hapur dyert e mortit, ndërsa nëna e dy vogëlushëve, Silvana 24-vjeçare është në traumë fizike dhe psikologjike. Ajo i kishte nxjerrë vetë nga makina dy vogëlushët e pajetë pas aksidentit.
BW/d.i.
