Një aeroplan me 66 persona në bord u përplas me një helikopter ushtarak dhe për pasojë deri më tani është raportuar për 19 viktima.
Avioni nga Wichita, Kansas për në Uashington u përplas me një helikopter ushtarak pak para orës 21:00 (02:00 me orën shqiptare).
E teksa kërkimet po vazhdojnë, shpresat për të gjetur pasagjerët e mbijetuar po zbehen.
Në bordin e avionit gjendeshin 60 pasagjerë dhe 4 personel ndërsa në helikopterin ushtarak, i cili ishte në një fluturim trajnimi, kishte në bord 3 ushtarë amerikanë. Në avion ndodhej dhe bashkëshortja e Hamaad Raza, një qytetari i cili është duke e kërkuar me dëshpërim partneren e tij.
Për mediat vendase ai ka zbuluar dhe mesazhin e fundit që ajo i kishte dërguar vetëm pak para se të ndodhte tragjedia.
“Unë thjesht po lutem që dikush ta nxjerrë nga lumi ndërsa flasim. Kjo është gjithçka për të cilën mund të lutem, thjesht po i lutem Zotit ”, tha ai, teksa më tej bëri me dije se mesazhi e fundit që 26-vjeçarja i kishte dërguar thuhej se do të ateronin për 20 minuta
“Ajo më dërgoi një mesazh ku thoshte se do të uleshin për 20 minuta”, tha ai.
Kujtojmë se aksidenti tragjik u regjistrua rreth orës 21:00 me orën lokale (02:00 30 janar me orën tonë). Avioni me 66 pasagjerë në bord, u përplas me një helikopter ushtarak teksa po ulej në Aeroportin Kombëtar Ronald Reagan pranë Uashingtonit, DC, duke përfunduar më pas në ujërat e ftohta të lumit Potomac.
Deri më tani është bërë e ditur se 19 trupa të pajetë janë nxjerrë prej lumit Potomac, ndërsa 4 persona janë nxjerrë të gjallë. Ekipet e shpëtimit po vijojnë kërkimet për pasagjerët e tjerë.
Temperaturat është raportuar të jenë tejet të ulëta, një faktor që po ndikon edhe në misionin e shpëtimit. Ndërsa autoritetet amerikane janë duke hetuar rastin dhe duke vijuar kërkimet, Aeroporti Kombëtar i Uashingtonit, “Ronald Reagan” i ka ndalur të gjitha fluturimet.
