Teksa rrugët e kryeqytetit çdo ditë rëndohen nga trafiku i automjeteve, ekspertët e fushës rekomandojnë zgjidhje konkrete dhe të shpejta.
Një prej tyre është edhe unaza e mesme e qytetit, sipas ekspertit rrugor Artur Sulçe.
“Linjat e dedikuara, vendosja e qendrave për kontrollin e trafikut, vendosja në efikasitet e unazës së mesme – në bulevardin ‘Zhan Dark’ apo ‘Bajram Curri’ – si një linjë e verdhë për autobusin, për emergjencën dhe taksitë, ku mund të lëvizin normalisht edhe biçikletat. Të gjithë semaforët duhet gjithashtu të pajisen me sensorë, në mënyrë që të rakordohen në funksion të rrymave të trafikut,” thotë z. Sulçe.
Moslejimi i parkimit të automjeteve, sidomos në kryqëzime, apo përdorimi i teknologjisë dhe riformatimi i të semaforëve të kryeqytetit është një tjetër pikë, sipas ekspertëve, që u rekomandohet autoriteteve vendore dhe qendrore.
“Heqja e parkimit pranë kryqëzimeve, përdorimi i teknologjisë dhe digjitalizimi ose marrja në dinamikë e trafikut, ndërhyrjet për ta rregulluar dhe rrugët alternative do të sillnin realisht zvogëlimin e trafikut,” shton eksperti rrugor.
Specialistët apelojnë për të gjithë të rinjtë, të cilët studiojnë për arkitekturë apo për inxhinieri, që të punojnë për ide të reja për nyjat kryesore hyrëse-dalëse të qytetit.
“Bashkia e Tiranës së bashku me inxhinierë të trafikut duhet të japin tema për zgjidhjen e nyjave të ndryshme që ka qyteti i Tiranës,” thotë z. Sulçe.
