Seiti dyshohet të jetë “financieri” dhe një nga personat kyç të grupit “Habilaj”, të akuzuar për trafik ndërkombëtar droge në Itali. Gjykata e Katanias në shtetin fqinj ka caktuar masën e sigurisë “arrest me Burg” për të.
Ai rezulton në përgjimet e bëra nga Prokuroria e Katanias, për llogari të grupit të dosjes “Habilaj”.
Në këto përgjime, 40 – vjeçari nga Vlora del se ka lidhje të ngushta me dy vëllezërit Moisi dhe Florian Habilaj, me të cilët është takuar shpesh në Itali.
Përgjimet ambientale, autoritetet italiane i kanë kryer në një makinë në pronësi të Moisi Habilajt. Ata diskutojnë mbi shumat e parave që kanë fituar nga trafiku i kanabisit dhe mbërritja e ngarkesave të reja në brigjet italiane.
Në një rast, Nazer Seiti është përgjuar me Florian Habilajn për një sasi droge që do të mbërrinte në Itali. Një ditë më pas, policia e vendit fqinj, në atë vend që po diskutonin ata, kapi 800 kilogramë kanabis.
