Eksportet e biçikletave dhe mjeteve jo motorike u rritën gjatë 2016-s me 12%, pas dy viteve (’14 dhe ’15) me rënie. Aktorët e tregut pohojnë se ka një tendencë në rritje të kërkesës për biçikleta…
Aktorët e tregut thonë se disa prej arsyeve kryesore që shqiptarët po shkojnë drejt biçikletës janë trafiku i rënduar dhe vështirësia për të gjetur një vend parkimi në kryeqytet. Sipas Gerti Dumës, menaxher në një nga kompanitë që tregton biçikleta, kërkesa për biçikleta është dyfishuar në dy vitet e fundit.
Edhe Enedi Mato, nga Ecovolis, që merret me tregtimin e biçikletave të vjetra, por edhe dhurimin e tyre me qëllim rritjen e ndërgjegjësimit për përdorim, tregon se ka një tendencë në rënie të kërkesës për biçikleta të përdorura dhe në rritje për biçikletat e reja.
Çmimet për një biçikletë të re në treg variojnë nga 40 mijë lekë deri në 100 mijë lekë, por ka edhe biçikleta që kushtojnë 400 mijë lekë. Sipas aktorëve të tregut është rritur interesi për biçikleta cilësore.
Aktualisht, qyteti i Tiranës numëron afërsisht 20 mijë pedalues, të cilët e përdorin thuajse përditë biçikletën, ndërkohë që numri i tyre ishte shumë më i ulët para pesë viteve, thotë Enedi Mato nga Ecovolis.
Por numri i çiklistëve të kryeqytetit nuk është aty ku dëshirohet, megjithëse trendet janë optimiste.
Biçikletat kineze pushtojnë tregun
Sipas të dhënave, në 2016-n, importet e biçikletave dhe mjeteve jo motorike kapën vlerën e 1 milion dollarëve, me një rritje prej 12% krahasuar me një vit më parë. Në çdo pesë biçikleta të importuara në Shqipëri, katër vijnë nga Kina, ndërsa pjesa tjetër vjen kryesisht nga Italia (rreth 12% e totalit të importit) dhe nga Gjermania (3% e totalit).
Trendi i biçikletave në Europë, BE-ja importoi 2 mln biçikleta gjatë 2016-s
Numri i importeve dhe eksporteve i biçikletave është rritur ndjeshëm brenda dhe jashtë BE-së në pesë vitet e fundit. Sipas Eurostat, në 2012-n, numri i biçikletave të eksportuara nga BE-ja ishte 209 mijë, ndërsa në vitin 2016, nga të dhënat e eksporteve, raportoheshin 830 mijë biçikleta të eksportuara. Edhe numri i importit të biçikletave ka pasur rritje të ndjeshme. Në 2012-n, numri i biçikletave në BE ishte në nivelin e 550 mijë, ndërsa në 2016-n, kjo shifër arriti në thuajse 2 milionë.
Një në tre biçikleta janë të eksportuara nga Gjermania
Gjermania eksportoi 240 mijë biçikleta në 2016-n, duke përfaqësuar rreth 29% të totalit të eksporteve në BE. Kjo bën që Gjermania të listohet si eksportuesi më i madh i biçikletave nga të gjithë vendet anëtare të BE-së. E dyta renditet Belgjika me 170 mijë biçikleta (20% e totalit të eksporteve), Holanda me 100 mijë biçikleta apo 12% e eksporteve, Rumania me 82 mijë apo 10% të eksporteve dhe Republika Çeke me 57 mijë apo 7% e totalit.
Nëntë nga dhjetë biçikleta u eksportuan nga vendet e tjera të Bashkimit Europian. Zvicra ishte destinacioni kryesor për biçikletat e eksportuara në vendet jo anëtare të BE-së (31,500 biçikleta u eksportuan gjatë 2016-s, apo 44% e eksporteve të biçikletave jashtë BE-së, pasuar nga Japonia (15 mijë, 21%), Australia dhe Shtetet e Bashkuara (2,300, 3%), Kina (1,200 mijë, 2%), Kanadaja (1,100, 2%) dhe Zelanda e Re (1070, 1%).
Nga ana tjetër, më shumë se gjysma e importeve kishin si destinacion dy vendet anëtare të BE-së, Gjermaninë (560 mijë apo 28% të totalit të importeve) dhe Holandën (me 52 mijë apo 26% e importeve). Këto vende renditeshin dhe më para se Belgjika me 250 mijë apo 13% e totalit të importeve, Franca me 175 mijë apo 9% e importeve, Mbretëria e Bashkuara, 130 mijë apo 7% dhe Italia, 110 mijë apo 5%.
Në çdo 5 importe nga jashtë BE-së, 4 vijnë nga Kina
1.2 milionë biçikleta u importuan në BE nga vendet jo anëtare, duke përfaqësuar kështu 60% të totalit të numrit të biçikletave nga BE-ja. Kina, deri më tani, është vendi i parë i origjinës për këto importe, me rreth 932 mijë, apo 79% e totalit të të gjithë importeve nga jashtë BE-së, ndjekur nga Vietnami me 79 mijë apo 7% e totalit, Hong-Kongu me 37 mijë e totalit dhe Zvicra 30 mijë apo 2.5%./monitor
a.ç
