2 fierakë, pjesë e një grupi kriminal që trafikonin heroinë nga Shqipëria në Greqi dhe më pas në BE janë arrestuar me urdhër të SPAK. Arrestimi i Irfan Sulajt dhe Dëfrim Çelajt, që konsiderohen si kokat e këtij grupi, u bë nga RENEA në Gjirokastër, teksa gazetari i Report Tv Arsen Rusta mëson se ndaj tyre SPAK ka nisur edhe hetim pasuror.
Referuar njoftimit zyrtar, hetimet për këtë grup kanë nisur që në vitin 2019 në bashkëpunim me Greqinë dhe Maqedoninë, ndërkohë që 2 persona të tjerë janë ende në kërkim me iniciale F.XH. e R.SH. Në Shqipëri janë kapur 3 raste të trafikimit të drogës, me rreth 15 kg heroinë, ndërkohë që në Greqi është kapur një sasi e konsiderueshme marijuanë dhe heroinë. Nga ana tjetër, edhe në Maqedoninë e Veriut është kapur vetëm marijuanë. SPAK ka ngritur ndaj tyre tre akuza: “trafikim i narkotikëve, kryer më shumë se një herë në kuadër të grupit të strukturuar kriminal, “Grup i strukturuar kriminal” në formën e drejtimit dhe “Kryerje e veprave penale nga organizata kriminale”.
“Hetimet në lidhje me këtë procedim penal janë kryer në kuadër të operacionit “Kujtesa”, në bashkëpunim të ngushtë me Drejtorinë e Përgjithshme të Policisë së Shtetit dhe nëpërmjet shkëmbimit të informacioneve të vazhdueshme me autoritetet e Drejtësisë të Greqisë dhe Maqedonisë së Veriut. Nga hetimet e kryera është bërë e mundur mbledhja e provave, mbi bazën e të cilave janë ngritur dyshime të arsyeshme se personat nën hetim Irfan Sulaj dhe Dëfrim Çela gjatë vitit 2016 në bashkëpunim me lidhjet e tyre kanë drejtuar trafikimin nëpërmjet koordinimit të transportit dhe trafikimit të sasive të lëndëve narkotike, kryesisht të llojit heroinë nga Shqipëria në drejtim të Greqisë dhe më pas për në vendet e tjera të BE-së”, thuhet në dokument.
Priten të mësohen të tjera detaje në vijim, se kush janë Irfan Sulaj dhe Dëfrim Çelaj, apo detaje të tjera që mund të krijohet një panoramë e plotë të këtij trafiku heroine.
