Vajzat shqiptare janë mes atyre nigeriane dhe rumune që janë të detyruara të shesin trupin e tyre, teksa përfshihen në mesin e 21 milion skllavëve që numërohen sot në botë.
Gra aziatike që jetojnë si skllave në shtëpitë e libanezëve të pasur. Burra të detyruar të punojnë në vendet e ndërtimit të vendet e Gjirit Persik. Burra dhe gra që zhduken për të ushqyer tregun e zi të trafikut të organeve.
Shumë fytyra të ndryshme të trafikimit të qenieve njerëzore. Aq shumë sa është tejet e vështirë që të ketë të dhëna të sakta.
Organizata Ndërkombëtare e Punës (ILO) dhe Zyra e Kombeve të Bashkuara për Drogën dhe Krimin (UNODC) llogarisin se viktimat e trafikimit janë rreth 21 milion njerëz sot për sot në botë.
Një skllavëri moderne, e cila – sipas vlerësimeve më të besueshme – lëviz qarkullimin e rreth 32 miliardë dollarëve në vit.
Viktimat janë kryesisht gra dhe fëmijë (70% e totalit).
Shfrytëzimi seksual mbetet shkaku kryesor i trafikimit global (që prek rreth 53% e viktimave), por në vitet e fundit është rritur ndjeshëm trafikimi për shfrytëzim për punë (40%).
Përveç kësaj, thekson UNODC, gjithnjë e më shpesh viktimat janë fëmijë të cilët përbëjnë rreth një të tretën e të gjitha viktimave të trafikimit që janë identifikuar.
Ndër këto, dy nga tre janë femra.
Europa përbën një nga destinacionet e preferuara për trafikimin e qenieve njerëzore, veçanërisht në lidhje me gratë e reja të destinuara për tregun e seksit.
Përsëri, është e vështirë që të ketë të dhëna të besueshme mbi masën reale të fenomenit.
Por raporti i fundit i BE-së flet se janë më shumë se 9,500 viktima të trafikimit të zbuluara në vitin 2010, nga të cilat 15% ishin të mitura.
Italia, në këtë skenar të zymtë, është një nga vendet kryesore të destinacionit dhe tranzitit.
Por përgjatë rrugëve dhe në banesat e shumë qyteteve italiane ekzistojnë me mijëra gra të reja rumune, shqiptare, moldave dhe kineze që shfrytëzohen si skllave seksi.
Panorama
