Ditën e djeshme, zëdhënësja e Ministrisë së Jashtme Ruse Maria Zakharova, ka akuzuar Ukrainën, për trafik organesh të viktimave të luftës.
Në një editorial të publikuar në ‘Rossiiskaya Gazeta’ , Zakharova, shkruan se ‘Ukraina ka qenë e njohur si lider botëror në trafikun e organeve’ prej shumë kohësh, duke nisur që nga vitit 1990 e duke u rritur shumë pas asaj që ajo e quan ‘operacioni ushtarak special rus’ në shkurt 2022, sulmin e ushtrisë ruse ndaj territorit ukrainas.
Në një pjesë të editorialit të saj Zakharova lidh trafikun e organeve nga Ukraina me Ushtrinë Çlirimtare të Kosovës.
Sipas saj persona të përfshirë në UÇK mund të kenë lidhje apo po merren me tregti organesh ndërkohë që përmend gjykimin në Gjykatën Speciale të Hashim Thaçit e ish-krerëve të tjerë të UÇK-së.
“Ka informacione se personat e përfshirë në Ushtrinë Çlirimtare të Kosovës mund të kenë një dyqan organesh ose së paku të merren me këtë tregti. Një nga udhëheqësit e saj tani është në gjyq për trafikim të organeve të ushtarëve të vdekur serbë, civilëve dhe disidentëve të tjerë gjatë luftës në Jugosllavi. Ushtria është ende duke funksionuar, por me një emër tjetër dhe ushtarët e saj mund të luftojnë si mercenarë në Ukrainë.” – shkruan Zakharova.
Pak ditë më parë, autoritetet shqiptare arrestuan Dritan Goxhajn, me kërkesë të Dhomës së Specializuar të Kosovës me qendër në Hagë, ku po gjykohen ish-krerët e UÇK-së Hashim Thaçi, Kadri Veseli, Jakup Krasniqi e Rexhep Selimi, të cilët akuzohen për krime lufte në periudhën 1998-1999.
Sipas Prokurorisë së Përgjithshme të Shqipërisë, Goxhaj dyshohet për veprat penale të ‘kanosjes gjatë procedimit penal’ dhe ‘pengimit të funksionarëve në kryerjen e detyrës zyrtare’.
Çështja e trafikut të organeve nga UÇK-ja duke përdorur baza në Shqipëri, mes të cilave më e njohura ka qenë Shtëpia e Verdhë në Mat, u përdor nga Carla del Ponte e Dick Marty për të ngritur akuza ndaj UÇK-së.
Në 3 prill 2023, në një intervistë në Euronews, Dritan Goxhaj, e denonconte shkrimin ‘Shtëpia e Verdhë’ nga BIRN si të porositur nga Beogradi dhe akuzonte bashkëautorin e shkrimit, njëherazi dëshmitar në gjyqin në Hagë, Altin Raxhimin.
“Gjithçka nisi në bazë të një letre të bërë nga gazetarët e Birn, në atë kohë Birn nuk kishte për Shqipërinë, por paguhej direkt nga Beogradi dhe shkrimin e bënte një amerikan dhe një shqiptar. Shqiptari është Altin Raxhimi i cili ka shkruar këtë letër ku thotë se janë arrestuar dhe mbajtur nga UÇK-ja në Kukës në këtë fabrikë me 19 shqiptarë dhe për këtë shkrim që ky zotëri ka përfituar azil politik sot në Kanada dhe është gjithashtu i fshehur dhe dëshmitar i mbrojtur i Prokurorisë Speciale kundër gjykimit që do të fillojë sot kundër të akuzuarve. Ky artikull është pranuar në prokurorinë e UMNIK-ut dhe në bazë të këtij neni ka filluar një proces gjyqësor në vitin 2009.” – deklaronte Goxhaj.
Rreth dy javë më parë, më 26 korrik, BIRN publikoi një tjetër shkrim me titull ‘Në gjurmët e një vendimi të pakapshëm për trafikimin e organeve në Kosovë’. Shkrimi nuk ka asnjë fakt apo të dhënë e shërben thjesht për të mbajtur gjallë tezën e trafikut të organeve.
Lidhur me arrestimin e Dritan Goxhajt, eksperti i sigurisë Ilir Kulla tha se është bërë për shkak të krizës në të cilën ndodhet Gjykata Speciale si dhe për të dekurajuar dëshmitarët e mundshëm që kanë dijeni që të mos flasin, lidhur me ngjarjet për të cilat akuzohen ish-krertët e UÇK-së.
“Dritan Goxhaj është mik i vjetër me ish komandantin e UÇK në Prishtinë Sali Mustafën, që është dënuar 26 vjet dhe dy nga dëshmitarët që përmenden aty, janë edhe dëshmitarët të dosjes së zotit Mustafa dhe ai ka për të shkuar në apel dhe këtu është problemi, që të parandalohet çdokush tjetër që ka dijeni në raport me ngjarjet, dëshmitarët, të mos flasë se ndryshe përballet me burgun, siç i ka ndodhur Hysni Kucatit, Nasim Haradinajt.” – tha Kulla.
Ish-ministri i Jashtëm i Kosovës, Petrit Selimi, i ka quajtur akuzat e Zakharova-s të njëjtat me ato të Serbisë ndaj UÇK-së.
Ai shkruan në Twitter se shkrimi i Maria Zakharova-s është i njëjtë me pretendimet serbe daj UÇK-së për trafik organesh. Ai thekson se për më shumë se 10 vjet, Rusia ka bërë një fushatë në Këshillin e Evropës për të ‘hulumtuar’ raportin e Dick Marty-t e akuzat e tij ndaj UÇK-së për trafik organesh duke përdorur NATO-n. /Hashtag.al
