Një shqiptar 23-vjeçar u arrestua nga policia greke si pjesë e një organizate kriminale që merrej me trafikimin e kanabisit nga Shqipëria drejt shtetit fqinj.
Bashkë me të në pranga ranë edhe dy persona me shtetësi greke, të moshës 50 dhe 23 vjeç. Ata u arrestuan nga policia e Agronjos në aksin kombëtar pranë urës Rio Antiriou.
Shqiptari ka qenë në skedat e policisë greke si kontigjent i rrezikshëm kriminal.
Me të njëjtat akuza përballen edhe dy shqiptarë të tjerë, të cilët vijojnë të jenë ende në kërkim nga policia.
Gjatë kontrollit në makinën e 50-vjeçarit grek, u gjetën dhe u sekuestruan 22 kilogramë kanabis sativa i papërpunuar. Sipas informacioneve të policisë greke, 50-vjeçari grek kishte marrë drogën në Igumenicë nga dy shtetas shqiptarë që kishin hyrë në Greqi përmes vendit tonë. Dy shqiptarët që çuan drogën nga Shqipëria janë pikërisht dy personat e shpallur në kërkim.
Skema e përdorur prej tyre funksiononte në mënyrë të tillë që kanabisi dërgohej nga Shqipëria i papërpunuar dhe më pas përpunohej në Greqi, pasi u dorëzohej anëtarëve të tjerë të bandës kriminale. Policia thotë se banda planifikonte që të trafikonte nga Shqipëria në Greqi sasi të tjera të kanabisit.
