Avokati i Popullit zhvilloi Auditoriumin ”Gjendja e të drejtave kolektive të minoriteteve në Shqipëri”, në bashkëpunim me Prezencën e OSBE-së dhe Këshillin e Evropës, si dhe me mbështetjen e Mbretërisë së Danimarkës. Ky event u mbajt në Gjirokastër.
Problematikat e evidentuara nga inspektimet e Avokatit të Popullit në vendbanimet kryesore të minoriteteve dhe komuniteteve të tjera u trajtuan në një diskutim të moderuar midis ekspertëve në çështjet e të drejtave të minoriteteve, përfaqësuesve të institucioneve shtetërore, shoqërisë civile, grupeve të interesit, shoqatave të minoritetit dhe komunitetit.
Avokati i Popullit, Igli Totozani, theksoi se ky Auditorium kulmon punën e bërë nga institucioni për periudhën pas dorëzimit në Kuvend të Raportit të Posaçëm të Minoritetit në fillim të 2015.
Totozani tha se institucioni që drejton do të ftojë zyrtarisht Komisonet Parlamentare për një seancë të hapur dëgjimore me prezencën e përfaqësuesve të minoriteteve dhe institucioneve shtetërore, për të diskutuar mbi të drejtat e minoriteteve, standardet ndërkombëtare në këtë fushë dhe punën e institucioneve shqiptare.
Avokati i Popullit kërkoi:
-Miratimin e ligjit të minoriteteve, ku të përcaktohen kriteret sistemike ligjore për njohjen zyrtare të minoriteteve.
-Procesi i hartimit të ligjit duhet të jetë transparent dhe gjithëpërfshirës
-Të ndryshohet ligji për diskriminimin. Të shtohen shkaqet për diskriminim
-Të zbatohen rekomandimet e Komisionit Europian kundër razicmit dhe intolerancës (ECRI). Avokati I Popullit ka përgatitur për vetë institucionin një Plan Veprimi për të gjitha kontributet që mund të japë për zbatimin e rekomandimeve të ECRIT.
-Të miratohet dhe ratifikohet Karta Europiane e Gjuhëve Rajonale
-Një census i gjithëpranuar i bazuar mbi kritere objektive
-Pjesëmarrje më aktive dhe përfshirje në qeverisjen vendore dhe qendore të minoriteteve
Avokati i Popullit, Igli Totozani, shprehu një falënderim të veçantë per OSBE-ne dhe Këshillin e Europës për rolin e tyre të pazëvendësueshëm në përmirësimin e standardeve të jetës së minoriteteve në Shqipëri. Gjithashtu z. Totozani vlerësoi angazhimin e Ministrisë së Arsimit në plotësimin dhe respektimin e të drejtave të minoriteteve, si dhe Komitetin Shtetëror të Minoriteteve./a.m.
