Pas betimit të deputetit Eduart Ndocaj, fjalën e ka marrë deputetja demokrate Jozefina Topalli, e cila ka nisur të akuzojë Kryeministrin dhe qeverinë për korrupsion me tenderat për makinat e kabinetit qeveritar, për tenderin e hekurudhës Fier- Ballsh – Vlorë, ku opozita pretendon se i është dhënë djalit të nënkryetares së parlamentit, socialistes Valentina Leskaj. E teksa ish kryetarja e kuvendit Topalli riformuloi të gjitha akuzat e javës së Partisë Demokratike, ka reaguar deputeti Taulant Balla, i cili i ka thënë Topallit se nuk duhet të flasë për paratë, në kushtet kur fonia e Parlamentit që u bë në kohën e qeverisjes Berisha, u shit si gjermane, por në fakt është skarce. Kjo pasi për herën e dytë, në seancat plenare, fonia ka patur probleme.
“Na u shit fonia për gjermane dhe t’i e more kineze. Por fajin e ka auditi që nuk të kallëzon në prokurori për të gjitha shkeljet” tha Balla.
“Teknologjinë e fonisë që nuk punon e di Xhozefina se në cfarë hoteli e ka negociuar në Shqipëri apo Itali. Tenderi i rikonstruksionit të Kuvedit nuk dihet si është paguar. Jozefina Topalli harxhonte 750 mijë Euro në vit karburant për lëvizjet e saj, ndërsa merrte dieta për banim në Shkodër 1.4 mln Lekë, ndërsa banesën e kishte në Ballok” shprehet deputeti i PS, Balla.
Topalli: Burrat që janë nën 150 cm të gjatë nuk u kthej përgjigje. Fakti se këtu për të mbrojtur kryeministrin është një person gojështhurur… Unë do ju kërkoj një ndjesë, përpara pak vitesh kur kam qenë në karriken e kryeparlamentares, njërit i kam thënë që ta kapnin për zhelesh dhe ta nxirrnin jashtë…. ju kërkoj ndjesë për këtë, por sot është koha që të gjithë shqiptarët t’ju kapin juve prej zhelesh dhe tju nxjerrin jashtë.
Balla: ty o zonjë as në Partinë tënde nuk të duan më. Kështu që frustrimet e tua mbaji për vete dhe qëndroji afër Saliut, se Luli nuk të do.
