Gjykata e Krimeve të Rënda dha sot masat e sigurisë për të arrestuarit në operacionin antidrogë në Vlorë ku u vunë në pranga gjashtë persona dhe u sekuestruan mbi 7 mijë rrënjë bimë kanabis. “Arrest me burg” u dha për Taulant Haxhirajn, Shkëlqim Koçiajn dhe Arjan Hasanajn, ndërsa “arrest shtëpie” për Albert Aliajn.
Në Vlorë u arrestuan 6 persona, të cilët kujdeseshin për një sipërfaqe të konsiderueshme të mbjellë me hashash si dhe një punishte për tharjen e bimëve narkotike. Shkëlqim Koçiaj, 24 vjeç, banues në fshatin Dushkarak; Arjan Hasanaj, 43 vjeç, banues në Vlorë; Klajdi Imeri, 21 vjeç, banues në Vlorë; Taulant Haxhiraj, 35 vjeç, banues në Vlorë; Albert Aliaj, 53 vjeç, banues në fshatin Drizar të Mallakastrës dhe Xh.B., 18 vjeç, banues në Vlorë.
Të akuzuarve për këtë trafik iu vunë prangat teksa ishin duke konsumuar kafe në një lokal, ashtu si duket edhe në videon e operacionit.Policia, Prokuroria bashkë me Grupet e FNSH Fier zbuloi lëndën narkotike mes fshatrave Vezhdanisht dhe Treblovë.
Bimët u gjetën brenda 6 kasolleve, ku ishin fshehur rreth 2000 bimë narkotike në proces tharjeje si dhe rreth 5250 rrënjë bimë narkotike Cannabis Sattiva, të mbjella në lugina dhe zona të thella rreth 2 orë larg qendrave të banuara.
ma.me
