Kryetari i Partisë Social-Demokrate, Tom Doshi i ka kthyer përgjigje Partisë Demokratike, pas kërkesës që demokratët dorëzuan sot pranë Komisionit Qendror të Zgjedhjeve ku kërkuan të mos lejohet garimi në zgjedhje i Doshit.
“Duke u nisur nga shpifjet dhe akuzat e pabaza, nga frika e humbjes në zgjedhjet e 25 Prillit, sepse Partia Socialdemokrate e Shqipërisë do jetë faktor i rëndësishëm në politikën shqiptare, ju bëjmë me dije se jo vetëm kryetari i PSD-së, Z. Tom Doshi, por edhe të gjithë kandidatët në çdo qark të vendit janë konform ligjit! PSD njeh, respekton Kushtetutën e Shqipërisë dhe ligjet shqiptare!”-thuhet në reagimin e PSD.
Partia Demokratike i kërkoi sot KQZ-së që të mos e regjistrojë Doshin si kandidat në zgjedhje, pasi sipas PD, ai preket nga dekriminalizimi pasi i është ndaluar hyrja në SHBA. KQZ ka afat 2 ditë për të shqyrtuar kandidaturat e paraqitura pranë institucionit më të lartë zgjedhor në Shqipëri dhe më pas do të shpallë vlefshmërinë e emrave që do të vijojnë garën për 25 prillin.
g.kosovari
