Presidenti i SHBA-ve, Donald Trump tha të mërkurën se priste një njoftim zyrtar që në javën tjetër, se koalicioni që luftoi kundër militantëve të Shtetit Islamik, ka rimarrë të gjithë territorin e mbajtur më parë nga grupi ekstremist.
“Toka e tyre është zhdukur. Është një faktor i madh, pasi territori i kontrolluar prej tyre është zhdukur”, u tha Trump ministrave të jashtëm dhe zyrtarëve të tjerë të lartë nga 79 vende, që kanë punuar së bashku me Shtetet e Bashkuara në luftimin e grupit militant në Siri dhe Irak.
Vendimi i Trump për të tërhequr forcat amerikane nga Siria ka shkaktuar disa kritika në shtëpi nga ligjvënësit republikanë dhe demokratë, të cilët kanë frikë se Shteti Islamik mund të rimarrë forcën e vet.
Një ushtarak i lartë amerikan, si Joseph Votel, tha në dëshminë e senatit të martën se grupi mund të përjetonte një ringjallje pas një tërheqjeje të Uashingtonit, shkruan Botasot.
Trump nuk u lëkund nga vendosmëria e tij për t’u tërhequr, duke thënë se: Ne shpresojmë që t’u japim luftëtarëve tanë të guximshëm në Siri, një shtëpi të ngrohtë ku të jenë të mirëpritur”.
“Ushtria e Shteteve të Bashkuara, partnerët tanë të koalicionit dhe Forcat Demokratike të Sirisë kanë çliruar pothuajse të gjithë territorin e mbajtur më parë nga ISIS në Siri dhe Irak”, tha Trump në tubimin në Departamentin e Shtetit.
Ai tha se arritja “duhet të njoftohet zyrtarisht, diku, ndoshta javën e ardhshme, që koalicioni ka kontrollin e 100 për qind të kalifatit”.
