Tjetër tragjedi, mbytet varka, 28 emigrantë humbasin jetën, shumica janë fëmijë
Nuk ndalen tragjeditë me emigrantët. Një varkë me 120 emigrantë është mbytyr sot pranë brigjeve të ishullit grek, Farmakonis, ku 28 prej tyre kanë humbur jetën. Ndërkohë autoritet greke thonë se gjysma e viktimave janë fëmijë.
Prej orëve të para të mëngjesit të së dielës grupet e shpëtimit kanë mundur të shpëtojnë 68 prej tyre, rreth 25 kanë arritur me not në brigjet e ishullit Farmakonisi, ndërsa 28 janë mbytur. Midis viktimave janë katër foshnja të mitura dhe dhjetë fëmijë. Disa prej tyre janë gjetur në hambarin e varkës së mbytur.
Ndërkohë që vala e refugjatëve që vijnë nga brigjet turke drejt ishujve grekë është e pandalshme, kryeministrja e qeverisë së përkohshme të Greqisë, Vassiliki Thanou, që ka vizituar ishullin e Lesbos, ka deklaruar krijimin e dy qendrave të pritjes për qindra emigrantë në Athinë dhe Selanik.
