Policia e Durrësit ka goditur një rrjet të ushtrimit të prostitucionit në kuadër të operacionit të koduar “Storm 16”, pas një hetimi intensiv dyjavor.
Gjatë këtij aksioni, forcat e rendit zbuluan një ambient të marrë me qira në lagjen nr. 13, i cili shërbente posaçërisht për këtë veprimtari të paligjshme, ndërkohë që kontrolle u ushtruan edhe në një hotel të qytetit.
Nga ky operacion ka nisur procedimi penal për dy shtetase braziliane të moshës 33 dhe 27 vjeçare, të cilat u kapën në flagrancë në këto ambiente. Bashkë me to, policia ka proceduar edhe tetë persona të tjerë nga Vlora, Durrësi dhe Divjaka, të përfshirë në këtë çështje.
Hetimet janë shtrirë edhe te pronësia e ambienteve, ku dy shtetase të tjera braziliane janë shpallur në kërkim; njëra si personi që kishte marrë shtëpinë me qira për ta përshtatur për prostitucion dhe tjetra si bashkëpunëtore në këtë aktivitet.
Goditja ka prekur edhe anën financiare, pasi administratori i hotelit ku u gjet njëra nga vajzat po ndiqet penalisht për fshehje të të ardhurave. Në cilësinë e provës materiale, policia ka sekuestruar shuma parash që dyshohet se janë përfituar nga kjo veprimtari, së bashku me 10 celularë dhe pasaporta.
