(FOTO) Tiranë, Veliaj i rregullon lagjen ish- rivalit, Halim Kosova

Bashkia e Tiranës ka rikonstruktuar bllokun e pallateve në njësinë nr. 5 në kryeqytet, e njohur ndryshe si blloku “Shushica”. Por, një nga banorët e kësaj zone që do t’i gëzohet këtij investimi, me rrugë të reja, ndriçim dhe gjelbërim, është edhe ish-kandidati demokrat për kryebashkiak, Halim Kosova, kundërshtar i kryebashkiakut Veliaj në 21 qershorin e 2015.

Kryetari i Bashkisë së Tiranës, Erion Veliaj, së bashku me deputetin socialist Pandeli Majko ishin sot në këtë zonë ku panë nga afër investimet e rëndësishme që janë bërë. E sigurisht, Majko s’mund ta linte rastin pa bërë një batutë për Dr. Kosovën.

“Është një moment edhe pak më i veçantë që ky ndryshim, ky rregullim i kësaj infrastrukture i shkon edhe kandidatit të Partisë Demokratike dhe mikut tonë të përbashkët, Dr. Halimit sepse i kalon afër shtëpisë dhe mendoj se nga ky investim kënaqen të gjithë, si të majtët dhe të djathtët”, tha Majko.

Investimet në Njësinë nr. 5 ishin objekt debatesh edhe gjatë fushatës zgjedhore të qershorit 2015, kur kandidati në atë kohë, i Partisë Socialiste, Erion Veliaj i kujtoi kundërshtarit të tij në garë, kandidatit demokrat Halim Kosova, se premtonte investime në infrastrukturë ndërkohë që kishte ende të parregulluar lagjen e vet. Por, tashmë Bashkia e Tiranës po vijon investimet në çdo zonë ku përfitues është komuniteti, pavarësisht nëse janë të majtë apo të djathtë.