Pronarja e një dyqani rrobash në Tiranë i ka dhënë një dorë policisë duke e “arrestuar” vetë hajdutin që i kishte marrë disa mallra. Ngjarja ka ndodhur në prill të këtij viti, kur shtetasi me iniciale I. M. ka tentuar të vjedhë në dyqanin e saj në Rrugën e Dibrës. Ai është kapur në flagrancë nga pronarja e dyqanit, e cila, pasi e ka izoluar në dyqan ka lajmëruar policinë. Veprimi i I. M. iu nënshtrua shqyrtimit gjyqësor në Gjykatën e Tiranës.
Në përfundim të gjykimit, pak ditë më parë, gjykata deklarimin e fajshëm të tij për akuzën e “vjedhjes” dhe dënimin me 1 vit e 2 muaj burg. Referuar vendimit të gjykatës, episodi është regjistrur datës 3 prill 2017 në një prej dyqaneve të rrobave në Rrugën e Dibrës në Tiranë, raporton “Panorama”.
Pronarja e dyqanit ka pohuar se që prej mëngjesit e kësaj dite kishte vënë rë të pandehuri disa herë të tentonte të afrohej në dyqanin e saj me qëllim për të vjedhur mallra. Sipas pronares së dyqanit, rreth orës 18:50 i pandehuri I. M. ka marre disa rroba, konkretisht një bluzë dhe xhup të hollë femrash, të cilat kane vlerën prej 6.000 lekë.
Në këtë moment ajo e ka kapur nga rrobat dhe e ka futur në dyqan kur dhe i ka thënë që kishte që në mëngjes që përpiqej te vidhte ne dyqanin e saj. I gjendur në këto kushte, i pandehuri I. M. ka kërkuar falje duke i thënë se sapo kishte dale nga burgu. Nga ana tjetër pronarja e dyqanit ka telefonuar në shërbimet e policisë, të cilët kanë shoqëruar të pandehurin. Gjatë gjykimi i pandehuri ka sqaruar se ditën e ngjarjes ka qenë në gjendje të dehur.
Sipas tij, duke lëvizur në Rrugën e Dibrës ka marrë gabimisht dy bluza të vendosura në manekinin e një dyqani. Ai ka pohuar se e ka bërë këtë veprim ngaqë ishte i pirë dhe jo se kishte shkuar aty për të vjedhur. Gjithashtu ai ka treguar pendim për veprimin e kryer, duke këmbëngulur se gjithçka ka ndodhur për faj të pijes.
ma.me
