Policia e Tiranës, sektori i qarkullimit rrugor, ka ndërhyrë në gati 170 raste të shkeljeve të rregullave të qarkullimit rrugor. Sipas njoftimit të policisë Tiranë, në kuadër të masave për rritjen e parametrave të sigurisë rrugore, Policia Rrugore e mbështetur nga Patrullat e Përgjithshme dhe forcat “Shqiponja”, gjatë fundjavës që kaloi kanë intensifikuar punën për ndëshkimin e shkelësve të Kodit Rrugor.
Si rezultat, 15 drejtues mjeti janë arrestuar në gjendje të dehur, ndërsa 25 të tjerëve iu pezullua leja e drejtimit për konsum alkooli. Gjithashtu, 45 drejtuesve të mjeteve u është pezulluar leja e drejtimit pasi kanë tejkaluar normat e shpejtësisë, matur me radar. 64 drejtues janë ndëshkuar pasi janë konstatuar me mjete me xhama të riveshur, si dhe 27 drejtues mjetesh janë ndëshkuar pasi kanë qarkulluar në sensin e kundërt të lëvizjes.
Policia e Tiranës u bën thirrje të gjithë drejtuesve të automjeteve të zbatojnë rregullat e qarkullimit rrugor.
