Lejimi i TikTok që të vazhdojë të operohet nga kompania e tij mëmë aktuale, mund të lejojë qeverinë kineze të ndikojë fshehurazi në zgjedhjet amerikane, tha Departamenti i Drejtësisë në një paraqitje në gjykatë të premten vonë.
Prokurorët ngritën shqetësime se algoritmi i TikTok mund të përdoret në një fushatë “manipulimi të fshehtë” për të “ndikuar në pikëpamjet e amerikanëve për qëllimet e veta”.
“Ndër të tjera, kjo do të lejonte një qeveri të huaj të ndërhynte në mënyrë të paligjshme në sistemin tonë politik dhe diskursin politik, përfshirë zgjedhjet tona”, shkruan prokurorët.
Dokumenti shtonte, “nëse, për shembull, qeveria kineze do të përcaktonte se rezultati i një zgjedhjeje të veçantë amerikane është mjaft i rëndësishëm për interesat kineze”.
“Të lejosh qeverinë kineze të qëndrojë e gatshme për të përdorur TikTok me efektivitetin maksimal në një moment me rëndësi ekstreme paraqet një kërcënim të papranueshëm për sigurinë kombëtare”, shkruan prokurorët.
Deklarimi është në përgjigje të një padie federale të TikTok të ngritur kundër qeverisë amerikane në maj në një përpjekje për të bllokuar një ligj që mund të detyrojë një ndalim mbarëkombëtar të aplikacionit.
Ai ligj, të cilin presidenti Joe Biden e nënshkroi në prill, thotë se TikTok duhet të gjejë një pronar të ri deri në mes të janarit 2025 ose do të ndalohet plotësisht nga Shtetet e Bashkuara.
