UEFA ka zhvilluar një takim me tifozeritë e organizuara të kombëtareve që do të marrin pjesë në kampionatin europian France 2016. Midis tyre ishin edhe përfaqësues të “Tifozëve Kuqezi”. I kontaktuar nga Panorama Sport, një nga pjesëmarrësit, i cili pëlqen të mbetet anonim, ka shprehur habinë dhe pakënaqësinë se ishte i vetmi që nuk pati mbështetjen e federatës përkatëse.
“… është një nga gjërat që më ka bërë më së shumti habi dhe më ka bërë të ndihem keq përpara shumë të tjerëve që ishin aty. Ndryshe nga të gjithë, vetëm ne shqiptarët nuk ishim bashkë. Unë nuk isha pranë përfaqësuesit të FSHF-së dhe kjo jo për fajin tim, por se edhe kur kërkova ta takoj atë më bëri me shenjë që nuk mundej dhe më tha që mund ta takoja më vonë. Ndërkohë që mund të them se përfaqësuesit e grupimeve të tjera të tifozërive kanë qëndruar në të njëjtin hotel me përfaqësuesit e federatës dhe janë mbështetur shumë nga ata”.
Anëtari i TKZ thotë se në takim u diskutua për çështje të ndryshme, përfshirë për biletat, çka e ka nxjerrë blof federatën shqiptare.
“Kishte çështje të ndryshme, një prej të cilave ishte edhe ajo e shpërndarjes së biletave dhe unë mora një konfirmim të drejtpërdrejtë në sallë nga përfaqësues të UEFA-s: Shpërndarja e biletave, është e drejtë e federatave dhe UEFA nuk ka ndërhyrë në asnjërën prej tyre. Kam pyetur gjithashtu se si ka mundësi që të ketë kategorizime në tre tipa tifozësh për përfitimet në “Fan Club”- in e FSHF-së dhe si përgjigje kam marrë vetëm supe të ngritur me habi që nuk më kanë thënë asnjë fjalë”.
Panorama Sport
