Tifozët kroatë po bëhen gati ta marrin rrugën drejt Shkodrës për ta mbështetur ekipin e tyre përfaqësues në ndeshje me Kosovën, e cila do të zhvillohet më 6 tetor në stadiumin “Loro Boriçi”, shkruan Gazeta Zëri.
Një grup tifozësh kroatë i kanë bërë të gjitha planet për të shkuar në Shqipëri, pasi e konsiderojnë këtë si një udhëtim që ia vlen të bëhet, kur dihet se janë në pyetje 600-700 kilometra e në të kaluarën kishin bërë deri në 1600 kilometra në vend të ndryshme të botës për ta mbështetur ekipin e tyre të zemrës.
“Sportske Novosti” i ka intervistuar disa tifozë kroatë, prej tyre edhe Anton Ukaj, një shqiptar që jeton në Kroaci, të cilët janë gati për t’i dhënë krahë ekipit të Ante Çaçiç.
Ata sigurojnë se kanë bërë udhëtime në shumë vende të botës dhe se nuk kanë shkaktuar asnjëherë incidente, e këtë nuk do ta bëjnë as në Shkodër, pasi konsiderojnë se me shqiptarët i kanë punët mirë dhe se nuk ka vend për frikë në këtë aspekt.
Në fund, ata shpresojnë që Kroacia të fitojë dhe të festojnë në Shkodër, citohet “Zëri”. (b.an)
