Tifozët e klubit grek, Paok kanë shfrytëzuar sfidën e sotme ndaj Chelseat në Ligën e Evropës për të dhënë një mesazh politik, veprim ky që mund t’i sjellë telashe klubit për shkak se UEFA dënon mesazhet politike në futboll.
Ky mesazh vjen vetëm pak ditë deri në referendumin që Maqedonia do të mbajë për emrin, transmeton Koha.net.“Maqedonia është një dhe e vetme dhe është këtu”, thuhet në banerin e klubit grek.
Qeveria e Maqedonisë dhe e Greqisë në qershor të këtij viti në Prespë nënshkruan Marrëveshjen për zgjidhjen e mosmarrëveshjes së emrit Maqedoni-Greqi dhe partneritet strategjik, sipas të cilës Maqedonia do të ndryshojë emrin e saj në Republika e Maqedonisë së Veriut.
Si pjesë e zbatimit të Marrëveshjes gjithashtu është paraparë mbajtja e referendumit në Maqedoni, i cili është planifikuar për 30 shtator të këtij viti. Pyetja e këtij referendumit do të jetë: “A jeni për anëtarësim në BE dhe NATO duke pranuar Marrëveshjen ndërmjet Maqedonisë dhe Greqisë?”. (b.an)
