Kryeministri Edi Rama i është përgjigjur akuzave të opozitës për qëndrimin sipas saj kundër SHBA-së në votimin në OKB për statusin e Jeruzalemit. Në deklaratën e tij para parlamentit, shefi i qeverisë theksoi se opozita e sotme është e trembur nga drejtësia dhe sajon kauza nga hiçi. Rama iu drejtua paraardhësit të tij berisha se “Nuk e gjeni dot në Jeruzalem shpëtimin”.
“Sot keni kërkuar debat për Jeruzalemin, nesër mund të kërkoni për kanalin e Panamasë, pasnesër për rritjen e temperaturës në Polin e Veriut. Sepse ju jeni në një hall të pangushëllueshëm, dhe do ishit në gjendje të shpërthenit edhe një luftë nukleare në qoftë se do kishit gjë në dorë. Replika juaj është baltë, përpëlitje, sepse ajo e shkreta e dhe e mallkuara reformë në drjetësi që e votuat me të dyja këmbët në një këpucë, sepse ai vettingu që nuk e ndal dot, sepse kjo partia këtu që nuk e mundët dot, ju kanë futur në një hall shumë të madh. Dhe sepse e dini fort mirë se sa të jetë kjo parti në qeveri skeni asnjë shans që ky vend të mbetet pa drejtësi. Siç ishte për sa kohë ju e sunduat dhe e torollisët duke e kthyer shtetin shqiptar në një zhele pa asnjë lekë. Ju sot jeni gati të bëheni çifutë, eskimezë, dele e zezë e këtij vendi vetëm që mos të jeni këta që jeni e shiheni pas një identitei tjetër që mos t’ju kapin. Dëgjova njërin nga ju që doli në një kazan, e tha nuk duam investime turke, ai kur gdhihet ha pilaf, e pastaj i fut groshë e pastaj tapë. Pilaf, groshë dhe frikë nga ajo që po ju vjen, e skeni faj”, deklaroi Rama.
Rama u ndal edhe te lapsusi i Berishës kur gjatë fjalimit ngatërroi 21 Dhjetorin e votimit në OKB me 21 janarin. Rama tha se 21 janari ëhstë makth për Berishën.
“Nuk është rastësi, çohesh këtu o Sali e thua 21 janari fjalën e parë, ndërkohë që doje të thoje 21 Dhjetori. Gjuha shkon atje ku dhemb, e gjuha aty të shkon. Ti Sali, bashkë mi artistin, mikun tim Lulzim, firmosët një marrëveshje antikushtetuese që e përkthyer në gjuhën popullore quhet tradhti ndaj atdheut për cënim territorial. Ti Sali je i ditur e i djallëzuar, por je i trembur, të gjithë jeni të trembur. Këtu mes jush ka njerëz që kanë jo pak arsye të tremben. Frika ju bën haluçinant”, deklaroi Rama./a.m.
