Kryeministri Edi Rama vijoi këtë të martë komunikimin “Sy m’sy” me qytetarët duke u kthyer përgjigje nëpërmjet rrjeteve sociale. Një koment i një qytetari që i thoshte ‘je më sheik se ai sheiku’, kryeministrit duket se i bëri më përshtypje.
“Ti je më sheik se ai sheiku. Çfarë të të them unë ty tani? Të ta them shqip fare? Jo s’po ta them shqip fare se pastaj thonë është nervoz Edi Rama se në fakt ti e do shqip fare. Ku e di ti? Çfarë di ti për mua, përveç atyre gjërave që unë i kam familjarisht të deklaruara? Çfarë di ti për mua? Nga i di ti këto? Ku i di ti që merr përsipër të bësh një ofendim kaq të madh. Kjo është arsyeja e mjaftueshme për të gjithë ata që duan të besojnë, se kush nuk do të besoj s’ka për të besuar kurrë, që pse jam unë këtu”, tha Rama.
Dhe këtu sqaroi se cilat janë qëllimet e tij. E para është futja e Shqipërisë në Bashkimin Europian dhe së dyti marrja hak për veten dhe të gjithë emigrantët për mënyrën si janë parë të pabarabartë në të kaluarën.
“Unë jam këtu që të vendos atë “Albania” te tryeza e Këshillit Europian. Dhe unë jam këtu për të marrë hak që ta dini ju të gjithë. Për të marrë hak për veten time kur kam qenë emigrant dhe pavarësisht se nuk rrija nën ura dhe ato historitë idiote që kanë treguar, por kur kaloja kufirin e aeroporteve, s’merret pasaporta shqiptare dhe më shihte polici sikur po shikonte dikë që po hynte në vendin tjetritn për të bërë akt terrorist. Unë kam qenë emigrant dhe jam këtu për të marrë hak për mënyrën si janë sjellë me shqiptarët ata që nuk i njihnin apo të cilët ishin racistë. Unë jam këtu për të marrë hak për të gjitha poshtërimet që i janë bërë shqiptarëve dhe shqiptarëve domethënë edhe mua vetë personalisht në gjithë vitet e historisë sonë, poshtërime që ia kemi bërë ne vetes se armiqtë më të mëdhenj të shqiptarëve kanë qene vetë shqiptarët, por dhe të tjerët. Jam këtu për të marrë hak për fëmijët, për fëmijët e mi, atë më të voglin se ata të mëdhenjtë janë mjaftueshëm të mëdhenj të marrin hak vetë po të duan dhe për gjithë ata si ai që të jenë të barabartë përfundimisht dhe mos t’i shohë njeri nga lart poshtë”, tha Rama.
