Ministrja e Infrastrukturës dhe Energjisë, Belinda Balluku është përfshirë në një debat me deputeten Fatjona Dhimitri, gjatë seancës së sotme në Kuvend.
Dhimitri hodhi akuza në drejtim të Ballukut, në lidhje me menaxhimin e situatës në vend, pas goditjes nga moti i keq.
“Ju hipni mbi borë pastruese me varëse mijëra euro dhe me rroba luksoze”, iu drejtua Dhimitri Ballukut.
Balluku iu përgjigj duke i thënë se regjistrimi i videos së ministres mbi borëpastruese, ishte i domosdoshëm, pasi hga terreni, zëri i saj nuk mund të dëgjohej.
Ajo ironizoi duke i thënë Dhimitrit se mund t’ia bënte një xhiro nëse i kishte ngelur në mendje.
“Nuk e di nëse keni dalë në terren. Siç i keni parë Taulantin të futur në ujë dhe borë. Kërkoni pak bëni kërkim para se të shkruani fjalët. Bora pa dyshim bie edhe pasi kalon borëpastruesja. 37 kontratat rajonale të mirëmbajtjes kanë qenë aktive. Është përballuar në mënyrën më të mirë kjo propagandë. Juve që ju ngeli mendja të borëpastruesja ku hipa unë mund t’iu bëj një xhiro me borëpastruese. Atë video e bëra në borëpastruese sepse në terren nuk dëgjohej zëri.
E di çfarë është kjo dhe ku doni të dilni. Ju thoni që nuk ka polici në terren. Por si u hapën këto rrugë. I hapët ju me imagjinatën tuaj duke parë televizor. Cili shqiptar ka ndonjë dyshim se si e kemi përballuar ne tërmetin. Në Aquila ka njerëz që jetojnë ende në kontejner. Ne po mbarojmë shtëpitë pa I kërkuar asnjë ndihmë qytetarit.
Në Shqipëri po kompensohen të gjithë për dëmet. Unë e kuptoj që ti nuk ke shumë punë për të bërë dhe mundësia jote është të dalësh njëherë në javë. Njerëzve nuk i mjafton tërmeti dhe pandemia por ju kanë dhe ju që lëshoni helm”, tha Balluku.
g.kosovari
