Thumanë/ Ylli falënderon Ramën: I keni dhënë sportit gjallëri, me paratë që do vijnë nga kompanitë e basteve

Në konferencën mbi sportin që u zhvillua në Thumanë, ka qenë i pranishëm dhe presidenti i Komitetit Olimpik në Shqipëri, Fidel Ylli, i cili shprehu falënderime ndaj qeverisë dhe ministritë për investimet e kryera.

Ylli falënderoi Ramën në veçanti, duke thënë se ka gjallëruar sportin, ndërsa shtoi se dhe me disa fonde që do të vijnë nga kompanitë e basteve, sporti shumë shpejt do të zërë vendin që i takon në shoqërinë shqiptare.

“Me ndihmën e qeverisë, që duhet ta falenderoj kryeministrin, kemi bërë disa gjëra, sepse për herë të parë në historinë e kombit shqiptar, i është dhënë një buxhet për të sjell afër palestrave të rinjtë shqiptarë që të largohen nga veset e lokale dhe të afrohen për të bërë vlejboll, basketboll.

Ky është një projekt masiv që për herë të parë ndodh në Shqipëri. Duke pasur më shumë buxhete ne mund të fusim dhe atletikën, gjimnastikën, mundjen, peshëngritjen, bilardon dhe të gjithë këto sporte që ne kemi patur kampionë. Por këtë nuk e bën komuniteti olimpik, e bëjnë federatat, trajnerët, sportistët elitarë që na kanë bërë krenarë.

Ndihem krenar kur sporti ka një ndër ligjet më të mira në botë, kur sporti dhe qeveria në bashkëpunim me Komitetin Olimpik, janë duke ideuar një qendër olimpike që do të jetë më e mira në botë. Këtë jua premtoj se i kam parë të gjithë qendrat olimpike.

Dua të falënderoj Ramën, që duke ndërtuar këtë qendër në Thumanë. Faleminderit kryeministër që i keni dhënë sportit një gjallëri tjetër dhe që shumë shpejt do të na vijë disa para nga kompanitë e basteve dhe sporti shumë shpejt do zërë atë vend që i takon në shoqërinë shqiptare”, tha Fidel Ylli./m.j