Kryetari i Partisë Demokratike ka marrë informacion se katër prokurorë belgë kanë mbërritur në Shqipëri për të zhvilluar një seancë pyetjesh me të, lidhur me ccështjen e njohur me emrin “Toyota Yaris”.
Burime nga Partia Demokratike, bëjnë të ditur se Basha është informuar jo zyrtarisht, por përmes rrugëve të ndryshme, mes të cilave edhe ato mediatike.
Ndërkohë, të njëjtat burime bëjnë të ditur se Basha do të respektojë organin e akuzës dhe sidomos prokurorët e ardhur nga jashtë vendit, ndërsa shtojnë se vetë Basha është vënë në kontakt me palën belge.
Kësisoj, Kryetari i PD, Lulzim Basha, ka shprehur gatishmërinë e plotë të kontribuojë në hetimin e autoriteteve të drejtësisë belge për dosjen e njohur si “Toyota Yaris”, ku u kapën 3.4 milionë euro.
Kryetari i opozitës është shprehur i gatshëm për të ndihmuar me informacionet që disponon në zbardhjen e lidhjeve kriminalo-politike në aferën e pastrimit të miliona eurove me garanci politike të përfaqësuesve më të lartë të kupolës së Rilindjes. Zoti Basha është në kontakt me autoritetet belge dhe mbetet në pritje të rakordimit me to për mënyrën e bashkëpunimit.
Katër prokurorët belgë që kanë mbërritur në Shqipëri do të marrin në pyetje kryedemokratin Lulzim Basha në lidhje me çështjen e ‘Toyota Yaris’.
Në lidhje me këtë çështje pati edhe akuza të forta politike mes Partisë Demokratike, i cila ka treguar gishtin drejt Taulant Ballës, si të përfshirë. Ky i fundit ka mohuar akuzat, duke paditur Bashën në gjykatë./shqip
g.kosovari
