Heiko Herrlich është trajneri i skuadrës gjermane Augsburg, që militon në Bundesligën gjermane. Këtë fundjavë kampionati gjerman rihap dyert për rifillimin e kampionatit por që tekniku i Augsburgut nuk do të jetë në pankinë këtë fundjavë për sfidën me Wolfsburg pasi ka thyer rregullat e karantinës. Ai la për disa momente hotelin ku ndodhej skuadra për të blerë një pastë dhëmbësh në supermarket. Ky konsiderohet një veprim i ndaluar dhe klubi ka komunikuar menjëherë se Herrlich nuk do ta drejtojë sktërvitjen e skuadrës për shkak të thyerjes së normave të protokollit por gjithashtu nuk do të jetë i pranishëm në stol as për sfidën e parë pas rikthimit.
“Ka kërkuar falje për veprimin e tij dhe gjatë ditëve të ardhshme do të testohet sërish me tamponë edhe pse ka rezultuar negativ, thekson klubi në një komunikatë. Vetë trajneri që vite më parë ka fituar betejën me një sëmundje të rëndë, ka pranuar të paguajë pasojat e veprimit.
Sipas protokollit gjerman, skuadrat duhet të grumbullohen në një hotel dhe të izolohen një javë përpara nisjes së kampionatit. Gjatë kësaj periudhe nuk lejohet dalja nga hoteli, vecse për të marrë pjesë në seancat stërvitore.
