Importet e energjisë në gusht do të mbulohen nga Korporata Elektroenergjitike shqiptare, e cila do të përdorë paratë e Bankës Botërore, një hua prej 22.4 milionë euro parashikuar posaçërisht për import energjie nga KESH-i në kushtet e krizave me thatësirë të zgjatur.
Kjo gjë do të lehtësojë të paktën për këtë muaj OSHEE-në, e cila ka detyrën e furnizuesit për konsumatorët.
Rreth 55 përqind e energjisë që hidhet në rrjet importohet, pasi në kushtet aktuale të thatësirës hidrocentralet e kaskadës së Drinit, prodhuesi kryesor në vend janë në nivele minimale të rezervës hidrike dhe po prodhojnë nën kapacitete.
Niveli i Fierzës ka arritur ne 271 m sipas shifrave zyrtare dhe prurjet 40 m3/s raporton TCH. Prodhimi në kaskadën e Drinit po menaxhohet sipas rregullores për administrimin e digave. Nga OSHEE është siguruar që nuk do të ketë mungesë të energjisë në rrjet dhe do të garantohet furnizimi me energji pa ndërprerje.
Por nëse thatësira vazhdon dhe gjatë vjeshtës, siç është deklaruar nga zyrtarët e OSHEE, atëherë do të ketë një plan për rishikim e buxhetit të brendshëm të vetë kompanisë, duke pakësuar zërat e investimeve për të mundësuar më shumë fonde për importet./a.m.
