Presidenti i Kosovës, Hashim Thaçi po merr pjesë në forumin “To Be Secure” në Budvë të Malit të Zi.
Thaçi është ftuar nga homologu i tij malazez, Milo Gjukanoviç, ku kanë diskutuar për përpjekjen e dy shteteve si dhe të gjithë rajonit të Ballkanit Perëndimor për anëtarësim në Bashkimin Evropian.
Thaçi është shprehur se vonesat e BE-së në vendimmarrje po shkaktojnë rritjen e populizmit në rajon.
“Për t’u bërë ky rrugëtim më shpejt është e nevojshme që vetë BE-ja të mos vonohet me vendimmarrje, sepse sa më shumë që po vonohet, aq më shumë po rritet ndikimi i akterëve tjerë të padëshiruar dhe populizmi në rajonin tonë. Bashkimin Evropian po bënë vlerësime të standardeve të dyfishta për Kosovën. Por alternativa jonë është e vetmja e ardhmja për Bashkim Evropian”, tha ai.
Presidenti Thaçi ka thënë se mbajtja e Kosovës në izolim është padrejtësia më e madhe.
“Padrejtësia më e madhe ndaj Kosovës po vazhdon të jetë mbajtja në izolim e qytetarëve tanë dhe bllokimi i perspektives për anëtarësim në Bashkimin Evropian. Kosova nuk është duke kërkuar alternativë tjetër, përveç anëtarësimit në BE, NATO dhe OKB. Kjo duhet të jetë e qartë, si për qytetarët e Kosovës, po ashtu edhe për bashkësinë ndërkombëtare”, tha presidenti.
Thaçi përsëri ka deklaruar se nëse BE, OKB dhe NATO do të vazhdojnë t’i mbajnë dyert e mbyllura për shtetin e Kosovës, atëherë udhëheqësit institucionalë dhe qytetarët duhet të mëndojnë një rrugë tjetër për arritjen e qëllimit të njejtë.
Deklaratat e tij të fundit, se Kosova duhet të mendojë bashkimin me Shqipërinë nëse Bashkimi Evropian do të vazhdojë të mbajë të izoluar Kosovën, presidenti i ka ritheksuar edhe në këtë samit.
g.kosovari
