Carlos Tevez ka rrëfyer se ky do të jetë sezoni i fundit për të si futbollist.
“Kjo është e sigurtë, pasi ky është edhe viti im i fundit në kontratë me skuadrën e Boca Juniors si futbollist”, tha “apashi”, që këtë vit feston 35-vjetorin e lindjes. Por sulmuesi argjentinas shpreson që të fitojë ende ndonjë trofe para se të varë këpucët në gozhdë.
Këtë vit, te skuadra e Boca Juniors ka mbërritur trajneri Gustavo Alfaro, për të cilin Tevez flet me superlativa.
“Po përpiqet që të rikthejë tek unë atë qetësi e lumturi që kisha kohë më parë, për të cilën kam nevojë për të luajtur futboll. Kam nevojë të ndihem sërish i rëndësishëm”, u shpreh më tej Carlos Tevez.
Ndërsa për ish-trajnerin Guillermo Barros Schelotto fjalët janë krejt të tjera:
“Kanë ndodhur gjëra që në një ekip tjetër nuk do t’i toleroja. Por janë gjëra që ndodhin dhe mbeten në dhomat e zhveshjes. Kam heshtur për të mirën e skuadrës, duke u stërvitur dhe duke vënë klubin mbi të gjitha. E dija që kjo ishte mënyra e tij për të më hequr qafe. E dija se nuk do të më lejonte të luaja çfarëdo që të bëja. Nëse ai do të qëndronte trajner i Boca, do të largohesha”, tha Tevez.
/telesport/a.r
