Tërmeti i fuqishëm që goditi qytetin turk të Izmirit dhe ishullin grek të Samos ka solidarizuar dy vendet, duke lënë mënjanë akuzat dhe kërcënimet për kurifin detar në Mesdhe.
Mediat e huaja shkruajnë se kryeministri Kyriakos Mitsotakis zhvilloi një bisedë telefonike me presidentin turk Rexhep Tajip Erdogan, për të shprehur ngushëllimet për humbjen e jetëve për shkak të tërmetit.
“Sapo thirra në telefon Presidentin Erdogan për të shprehur ngushëllimet e mia për humbjen tragjike të jetës nga tërmeti që goditi të dy vendet tona. Pavarësisht nga dallimet tona, këto janë raste kur njerëzit tanë kanë nevojë të qëndrojnë së bashku”,- shkruan Mitsotakis.
Ndërkohë që edhe ministri i Jashtëm grek, Nikos Dendias ka folur në telefon me homologun turk, Mevlüt Çavuşoğlu, për t’i shprehur gatishmërinë për ndihmën në procesin e evakuimit të qytetarëve, që kanë mbetur jashtë shtëpive të tyre pas tërmetit tragjik.
“Pas tërmetit të Samos dhe Smyrna, Ministri i Jashtëm Nikos Dendias kontaktoi homologun turk M.Cavusoglu dhe shprehu gatishmërinë e qeverisë greke për të dërguar drejtpërdrejt forcat EMAK në Turqi për të ndihmuar qytetarët e bllokuar”,- njofton Ministria e Jashtme greke.
/e.rr
