Mbi 1000 biznese, kryesisht në katet e para të pallateve, në Bashkinë e Durrësit kanë ndërprerë punën, për shkak të dëmeve të shkaktuara nga tërmeti i 26 nëntorit.
Por edhe pse ka kaluar një muaj biznesi vijon të jetë në gjendje të vështirë dhe pret nga qeveria ndihmë konkrete për të dalë nga kjo situatë.
Dhoma e Tregtisë dhe Industrisë në Durrës i ka propozuar ekzekutivit një paketë me 8 pika ku kërkon pezullim të taksave dhe tatimeve për një periudhë 3-vjeçare.
“Kur themi pezullim nuk themi falje dhe pastaj në një moment të dytë bizneset të kenë mundësi që të kenë likuiditet me qëllim shlyerjen e pagave. Pikë tjetër rimbursimi i TVSH për bizneset e mëdha që nuk kanë bërë rimbursimin për arsye burokratike dhe do të kërkonim mirëkuptimin e organeve qeveritare që të rimbursonin këtë”.
Për biznesin një çështje e rëndësishme konsiderohet ajo e pezullimit të kësteve të kredisë për të gjitha bizneset e prekura, si dhe e kompensimit sa më të shpejtë të dëmeve.
“Ne kemi pasur disa takime me përfaqësues të qeverisë me Ministrinë e Financave dhe atë të Sipërmarrjes, me te cilët me thënë të drejtën kërkesat tona i cilësuan si të drejta dhe janë duke punuar në një paketë propozimesh të cilën ne e presim me shpejtësinë më të madhe që të vihet në punë”.
Qeveria ndërkohë ka shprehur gatishmërinë që të ndërmarrë një sërë masash fiskale që do të lehtësonin sipërmarrësit në zonat më të prekura nga tërmeti. /e.s/
