Tërmeti në Itali,hetime për abuzimet në ndërtime, mund të ishte shmangur

Kjo është arsyeja se përse hetimet e kryera nga prokurori Giuseppe Saieva fokusohen në kriteret e ndërtimit, kryesisht në cilësinë e rikonstruksioneve që janë bërë në shumicën e ndërtesave. Ky hetim zhvillohet paralelisht me verifikimet që janë ndërmarrë nga prokurorët në Ascoli.  Pas verifikimeve do zbardhen edhe shkaqet e atyre shembjeve të cilat janë cilësuar anormale nga ekspertët. Të dhënat e momentit janë sipërfaqësore ndaj dhe hetimet e thelluara do të zbulojnë parregullsitë në ndërtime.

Në disa raste nuk është e vështirë të ngrihen dyshime pasi është e pashpjegueshme sesi struktura antike dominohen nga betoni. Dhoma, tarraca dhe veranda të shtuara kanë sjellë peshë të papërballueshme për themelet e ndërtesave duke sjellë një shkatërrim potencial të tyre, shkruajnë mediat italiane. Objektivi kryesor i hetimit është të identifikojnë zinxhirin e shkaqeve dhe pasojave që do të çojnë tek emrat e ndërtuesve që kanë realizuar rikonstruksionet e paligjshme.

Komunat do të identifikojnë teknikët që kanë dhënë lejet për shtesat dhe më tej do të vazhdohet me kompanitë që kanë bërë modifikimet. Në rastet e ndërtesave publike do të kontrollohen kushtet e kontratës, ndërkohë që për ato private do të verifikohet nëse janë ndjekur procedurat ligjore sipas kushteve të përcaktuara.